› 選擇地區
三藩市
紐約
洛杉磯
其他美國地區
香港 台灣 北美
 
2019年07月12日

【爆拒續約內幕】黃淑儀細仔遭TVB雪藏:佢點會諗到呢個圈子咁黑暗

建立時間 (HKT): 0712 00:30

做人阿媽超過半個世紀、71歲的黃淑儀(GiGi姐),自2000年回歸無綫後,便成為「大台阿媽」,錢嘉樂、楊明、馬國明、胡杏兒等全部都是她口中的乖仔乖女。GiGi姐日前接受《蘋果》專訪,淡然地說﹕「由主角變做人阿媽,當然接受,唔通叫我做少女咩,我都做唔到啦!」GiGi姐向來不計較角色輕重,在她眼中,演員只是一份工,即使在事業高峯,亦可以為愛拋低一切去嫁人。

相關新聞:【多才多藝】黃淑儀13年奪世界性烹飪美食大獎 《蘋果》前社長董橋提筆祝賀

GiGi姐曾經歷兩段婚姻,她為前夫劉芳剛和現任丈夫徐景清醫生合共生了四個仔女。最近特首林鄭月娥的母親論辣㷫不少香港人,然而真心愛錫子女的GiGi姐,卻從來不喜歡用高壓政策,見到孻仔徐肇平在演藝路上被人「蝦」更不畏強權幫手發聲。GiGi姐說:「係有啲擔心,當初我真係有啲心痛。肇平喺溫哥華讀演藝畢業,我叫佢返香港見識吓,學習點樣變通。上過我嘅節目後就簽咗畀無綫,一年生一年死約,但做咗冇耐就叫佢改簽6年合約,佢唔肯,佢覺得無綫冇一個具體規劃,佢外國人性格,會睇有乜嘢安排。」

最後無綫召喚「慈母」落嘴頭,可惜肇平都是選擇不加簽,卻難逃雪藏厄運。GiGi姐激動得咬牙切齒說﹕「更受傷一點係,我哋一齊演出舞台劇,經理人就話娛樂新聞節目一齊做訪問,但原來『唔得』,徐肇平唔可以出鏡,因為佢已經入咗黑名單。千真萬確嘅,仲有我個仔出兩本烹飪書,書展上一班年輕人都嚟恭喜佢。完咗我就同佢哋一齊去飲茶,一坐低就立刻收到無綫經理人電話,逐個打嚟鬧佢哋,『有冇腦㗎,佢而家被公司雪藏,你去捧佢場』。鬧到班年輕人喊呀,我在場我睇住。呢啲我唔怕講出嚟,情何以堪呢?呢班年輕人冇做錯事,點解要咁樣雪藏佢呢?仲有人話『冇聽過,公司冇雪藏佢』。我係肉赤㗎,我做阿媽。」

相關新聞:【鎮台三寶】年輕時是個萬人迷 黃淑儀:追我嘅有錢到你唔信

雪藏日子要捱多幾耐?她說:「捱多一年半,所以今時今日,佢點會諗到呢個圈子咁黑暗?!佢冇做錯事,點解要咁樣對我個仔。但我都冇辦法,我(之前)有合約在身,開心繼續做,唔開心就唔合作。」肇平近年轉投ViuTV,有做幕後製作、司儀及模特兒等工作,人也變得踏實。GiGi姐續說﹕「由佢捱,冇所謂。我希望外界對佢嘅評價係乖,總好過讚佢演戲好,但態度囂張,我就唔鍾意。」

GiGi姐在今年1月約滿無綫不續約,強調與兒子無關。她說﹕「我哋分得好清,只係唔想簽長約。」她原本會再拍《吾淑吾食》多倫多篇,監製已經開會,她亦做了資料搜集,可惜最後拍不成。她解釋﹕「我當時啱啱轉經理人,有啲時間錯摸。監製有問我點解唔簽長約呀?其實簽部頭就最好,完咗就完咗,唔係我咪俾無綫牽住鼻子走?雖然話簽一年約,但一年生、一年死,就變兩年,佢哋話將來會開節目,但又唔知確實時間,變相又唔可以出去拍嘢。」差不多時間,ViuTV開拍同類節目《Cooking GiGi台灣篇》,結果一拍即合。

GiGi姐喜歡煮餸,原來是「逼」出來!在廣州出世的GiGi姐,屬小康之家,屋企有工人、有司機,但幾歲全家搬來香港,GiGi姐的人生便起了變化,她苦笑說:「當時我先8歲,由大屋搬去徙置區,我成日都喊,點解我要煮飯畀屋企人食咁辛苦。但自從成功煎咗一條紅衫魚,阿爸當晚畀咗一個5毫子我,我就發覺,原來煮好一餐飯畀屋企人食,係有咁大迴響,有咁好嘅回報,然後我真係用心去學,用心去煮。」

家庭與事業,GiGi姐二話不說便選擇了前者,19歲便下嫁比自己年長21年的資深導演兼TVB藝員訓練班導師劉芳剛,當年媽媽極力反對,她亦置之不理:「我出嚟打工,唔通唔可以結婚咩,劉芳剛又冇不良嗜好,又唔係再婚,兩情相悅,呢個人還可以畀到安全感我。我覺得女人嫁夫隨夫,就係一輩子嘅事,冇諗過結咗婚就會冇事業,冇諗呢啲。」可惜兩人最後都因步伐不一致,離婚收場,她說:「當時我去咗外國讀書,兩個小朋友跟佢。我嘅諗法係,父母點唔啱都好,唔好延禍細路哥,佢哋永遠都係我個仔同我個女。」

80年代,GiGi姐認識了同樣離過婚的徐景清醫生,她笑說:「嗰時一班朋友出嚟食飯,有個朋友講我哋係同病相憐,都離過婚,呢句說話我就注意到佢。」GiGi姐再婚後,便跟隨徐醫生到加拿大生活,直至子女長大,她才復出返港拍劇兼做烹飪節目主持,她豪氣一句:「講真,其實我唔使做都得。」GiGi姐做工程師的三子肇麟上月底結婚,她與老公又一直恩愛,難怪臉上總掛着燦爛笑容。

採訪:嵐山
攝影:仇志德
攝錄:馮嘉銘

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載