› 選擇地區
三藩市
紐約
洛杉磯
其他美國地區
香港 台灣 北美
 
2019年07月12日

【鎮台三寶】年輕時是個萬人迷 黃淑儀:追我嘅有錢到你唔信

左圖:由受訪者提供 右圖攝影:仇志德
建立時間 (HKT): 0712 00:30

黃淑儀是麗的第二期訓練班出身,68年轉投TVB之後,跟汪阿姐和李司棋成為「鎮台三寶」。翻開舊照片,GiGi姐都忍不住笑說﹕「睇番啲相,都算係一種鞭策,點解而家咁肥,但我奶奶成日叫我唔使減,話呢個年紀,呢個體形啱㗎喇,哈哈。但幾年前,我膝頭半月板撕裂,做過微創手術,其實都要減吓。」

相關新聞:【多才多藝】黃淑儀13年奪世界性烹飪美食大獎 《蘋果》前社長董橋提筆祝賀

其中一張白色超低胸大露背裙,在80年代真是好大膽,GiGi姐卻說得輕鬆︰「我覺得冇乜嘢啫。」她曾經當過模特兒,還試過真空行Catwalk,她說﹕「唔係話性唔性感,而係有冇咁嘅需要,嗰件衫係貼到不得了,唔可能着內衣,咁我就唔着啦。」

GiGi姐個性爽直,集仙氣和型女於一身,年輕時已是個萬人迷 ,她自豪地說﹕「婚前婚後都多人追㗎,有啲有錢到你唔信,如果我願意約會,就問我今日着乜衫,開一架同顏色嘅勞斯萊斯嚟接我。」未滿18歲,已有人向她求婚:「入行前我喺日本修讀櫥窗設計,但監護人個仔表示對我有興趣,話唔訂婚就冇得留低,咁我梗係唔肯啦。」

相關新聞:【爆拒續約內幕】黃淑儀細仔遭TVB雪藏:佢點會諗到呢個圈子咁黑暗

輾轉間,GiGi姐投考麗的訓練班,未畢業已有機會做報時員,但亦因為派系鬥爭,無辜被炒。她說﹕「嗰時公司叫我哋去遊船河,我着咗一條白色長褲加丁字涼鞋,然後拎一個膠袋放暈船藥。去到先知原來係上戰艦參觀,汪明荃、禤素霞都打扮得好靚,我着成咁梗係尷尬,我就叫其他人行先,自己躲喺後面,因為實在太醜。結果第二日返到公司,就被鍾啟文(前麗的總監)召見我,話『我哋訓練一個人出嚟,唔想佢唔聽公司說話』,咁我就被人炒咗。」原來當時已有派系鬥爭,上位得太快,亦好快被人推下去。

在失意日子,GiGi當起模特兒,幸運地工作不絕,很快更獲簡而清推薦予鍾景輝,有機會接演全港第一部長篇電視劇集《夢斷情天》,她說﹕「King Sir畀咗段對白,『文景哥,你放心啦,你去讀書,幾時返嚟我都等你嘅』,叫我用唔同語氣演繹出嚟,呢啲真係塞翁失馬,焉知非福。」

當年盛傳GiGi姐與阿姐汪明荃不和,GiGi姐否認:「其實同煮嘢食一樣,都係各施各法,咁多角色都做唔晒,唔啱你做就係唔啱你做,有乜好爭?尤其我嫁咗畀劉芳剛之後,你都可以問番TVB高層,我從來唔上5樓,即係大粒佬坐嘅地方。」有指阿姐拍《書劍恩仇錄》劍傷她的左眼眉心,她拿起當年一張當年舊照,背面清楚寫着「1976年4月18日 拍書劍被汪明荃劍傷後,赴台休息」,相中她抱着一對子女,笑笑口說﹕「冇嬲,基本上佢唔係有心,我仲因為呢件事,無端端攞咗幾日假期去台灣住。」


採訪:嵐山
攝影:仇志德
攝錄:馮嘉銘

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載