› 選擇地區
三藩市
紐約
洛杉磯
其他美國地區
香港 台灣 北美
 
2019年07月26日

【麵包喻人生】老公打本黃婉曼開餐廳督促唔准懶 夫妻共識暫緩追仔

建立時間 (HKT): 0726 09:00

前天氣女郎黃婉曼(Icy)嫁得好,2014年嫁給會計師男友馮柏基,婚後兩年抱兩,為老公生了兩名囡囡,兩歲大女Kyra及兩個月大幼女Kaitlyn。Icy不甘心只做幸福少奶奶,她仍然熱切追求理想。Icy於2016年在鰂魚涌創業開了麵包學校,Icy心中一直另有目標是開餐廳,她努力苦幹了3年多,近日終如願以償,在將軍澳開了餐廳Rise Kitchen,店中還有麵包和甜品出售。

Icy去年籌備新餐廳初期,卻意外懷孕,過去9個月間,她同時孕育肚中BB和新店,忙得分身乏術。最近坐月出關的Icy,馬上準備餐廳7月29日開幕,她日前在店中接受《蘋果》專訪,大講生意經:「呢個概念店,由我搞麵包學校,4年前都想做,但香港地租太貴,咁我唯有上樓先,而家創業3年後,終於可以有啱地方搞,我可以將我鍾意嘅嘢,麵包、甜品,有嘢食、有酒飲,仲可以喺度學整甜品麵包,餐廳叫Kitchen,就要將廚房所有嘢放埋一齊。」

Icy實現夢想當然需要資本,新餐廳斥資7位數字,「投資係大,將以前努力做嘢賺啲私己錢放返入去,老公又要貼啲,各方親朋好友都幫手,有嚟幫襯我嘅朋友都當佢哋投資。」其實Icy於2016年開麵包學校時,她也腹大便便,看來兩女都旺她的生意,Icy說:「真係唔知邊樣先?可能我係一個冇乜計劃嘅人,同時擁有自己生意同兩個囡囡開心同忙嘅,總之發生咗就嚟啦,不過,我始終有少少對唔住細女,我坐完月就出嚟睇住間鋪,擺咗囡囡喺屋企,做地鋪要親力親為,需要同顧客多溝通,而細女得兩個月大,佢喺屋企飲奶食飽飽就瞓覺,有時我會帶埋大女出店度返工,佢就返附近幼稚園,我留喺鋪頭。我pack麵包,佢會幫手,大女又會拎布紙巾幫我抹枱抹窗。」可打算把店留給囡囡繼承?Icy說:「我做間鋪都係為囡囡,希望為佢哋做啲嘢。」是否有意18區開分店?Icy說:「咁又冇咁大諗頭,搞好呢間先,做生意我都係初哥。有內地同韓國朋友問過,麵包店會唔會跳出香港?我唔敢咁大諗頭,希望大家食到我哋冇落膨脹劑嘅麵包。」

創業容易守業難,Icy信心十足:「一步步嚟,搞好呢間先,都真係唔容易計到幾時回本,其實搞咗3年幾麵包學校都真係辛苦,有時都想放棄,但呢幾年裏,我學到一個好重要嘅道理,唔係明知會成功先去堅持,而係因為不斷不斷堅持,所以最後會成功,我會再堅持吓,我諗重要為兩個女同老公堅持,老公認真出錢出力,佢畀咗好多意見,做決定仲會幫我一齊諗,佢係會計師又有生意頭腦,仲會督促我認真工作。周六周日會篤住我唔好偷懶,佢會話鋪頭好多客人,你快啲出去返工,佢另一方面又會幫忙湊女,陪囡囡返playgroup同做運動,有老公幫手睇住個女,我好放心去工作。有時就我睇女,佢出去搵錢幫補我,大家互相支持。」

已有兩女的Icy,也有追仔計劃,不過看到經營新餐廳工作繁多,Icy宣佈「暫緩」追仔:「我滿足而家有兩個女,呢幾年我忙懷孕、餵奶同湊B,呢啲日子要暫緩一吓,我想做吓嘢先,大女要陪佢讀書,陪佢時間要抽多啲,我承受唔起再花時間去懷孕,要停一停先,收身都好艱難,我已同老公協調咗,兩個女係爸爸前世小情人,佢哋鍾意黐爸爸,我又煩住佢,老公都分身不下,所以佢唔會迫迫我追仔住。」

「麵包皇后」Icy會用哪一款麵包形容現階段人生?她即說:「以前我好鍾意白方包,貪佢好簡單,而家我生活豐富咗,我會用抹茶紅豆朱古力醬方包形容呢個階段,一粒粒嘅紅豆,甜甜哋係我囡囡,朱古力醬夠濃滑同甜蜜係我婚姻、我老公,抹茶好矜貴要提煉出嚟係代表我自己,需要不停磨練,方包就係我完整嘅一個家。」

採訪:比華利
攝影:陳慧安
攝錄:廖達燊

-----------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9
-------------------------------
錶迷必讀!
89頁腕時計電子書 66款嚴選年度新錶
https://hk.adai.ly/e/v7jEA0MC1X

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載