› 選擇地區
三藩市
紐約
洛杉磯
其他美國地區
香港 台灣 北美
 
2019年07月27日

【Andi見面淨係點頭】吳綺莉詳談母女情 卓林乖乖女易受人影響

建立時間 (HKT): 0727 06:00

吳綺莉(Elaine)為ViuTV拍攝的新劇《理想國》之《苟延殘喘》單元,下月初推出,劇中Elaine跟林祖輝的9歲兒子,與媽咪嗌交後自殺身亡。由睇劇本到正式演出,Elaine心情都是相當沉重,連監製陳翹英也曾笑說:「好在拍幾日,如果拍多幾個月你會黐咗線。」

現實生活中,Elaine母親的角色已經夠沉重。99年11月為已婚的國際級巨星成龍誕下私生女吳卓林一刻,兩母女一舉一動也成為全城焦點。幾年前,Elaine與卓林關係惡化,母女各自報警求助,日日成為各大報章頭條新聞。直至前年,17歲卓林宣佈出櫃,跟年長12歲的加拿大籍女友Andi相戀,再到去年二人被拍到在加國流浪,然後再到去年11月於加國結婚,一切一切,都令Elaine成為新聞焦點。Elaine日前接受專訪,再為母女情開腔。

(記:記者 吳:吳綺莉)
記:究竟劇中媽咪角色跟現實中可有相似地方?

吳:咁又冇喎,因為成個家庭背景唔同、成件事唔同,不過鬧細路,每一個阿媽都試過,我覺得係要溝通多啲。我睇完故仔,嗰刻對父母或者細路哥都係一個好大嘅提醒。我哋細個可能簡單啲,而家社會所有嘢競爭大咗,父母一定希望自己細路好,由幼稚園開始要學好多嘢,好大壓力,以前大學畢業一定搵到工,而家行出街基本上個個都大學畢業,變咗壓力係好大,有時壓力大時講嘢會大聲咗,唔好講話父母仔女,屋企人都會,就係提醒大家有時要平靜少少,有時相嗌唔好口。

記:拍完此劇後有沒有得着,譬如改善了與卓林關係?
吳:其實咁講,我係有另一番體會之後先去接呢個劇,我唔可以控制你開心唔開心,你嘅負能量正能量係影響到人哋㗎嘛。我覺得年代唔同,無論父母仔女,大家壓力其實大過以前,當你壓力大,大家都會碰撞,呢個碰撞,大家都會做一啲可能衝動咗嘅嘢,傷害對方嘅嘢,而令到件事向咗唔好方向發展。其實我係有一啲體會,所以我接呢個劇,對所有人都係一個提醒,有乜都好,慢慢講、慢慢傾。朋友話我以前啲脾氣好急好快,呢啲要自己去改變囉,而家啲朋友急,我就會話慢慢嚟、諗諗先,唔好咁衝動,定啲嚟,香港地方細,大家都會好急好快,拍呢套劇係一個好大嘅提醒囉。

記:意思是跟卓林之間不覺意講出一些傷對方的說話?
吳:當局者迷,旁觀者清,喺你好忙碌做緊嘢時,屋企人又好朋友又好同事又好,你顧唔到咁多嘢,有時你會忽略咗別人感受,呢樣嘢你咪要慢慢去學囉,站喺別人角度去諗件事,咁可能好多嘢會好好多。
對屋企人梗會大聲咗,大家唔熟一定客氣好多……呢個咪就係我學嘅嘢囉,冷靜啲,任何事都冷靜啲,唔好咁容易爆,特別屋企人,越親越會語氣重啲,你入到間餐廳,除非你有狂躁症,唔係嘅話你唔會見到個waitress、一個唔識嘅人大叫或者鬧人㗎嘛。

記:卓林去年在加拿大跟Andi結婚後,卓林之間相處又有沒有不同?是否已經接受了Andi?
吳:(想了一想)不如咁講啦,我學識尊重我個女囉,當然我都有我底線喺度,我唔會講你唔好咁咁咁,或者你要咁咁咁,我會覺得溫馨提示囉,所有嘢都係。比如佢同你住嘅,咪擺杯水去佢床頭囉,或者輕輕提提佢囉。

記:卓林跟Andi結婚後,跟Andi溝通會否多一點?
吳:我只係會去諗我個女,佢嘅感受。

記:Andi會叫你做auntie、媽咪、英文名Elaine,還是沒有叫過?
吳:我真係唔係好記得,唔係講笑,其實冇乜溝通……

記:難道見面打招呼也沒叫你auntie、媽咪一聲?
吳:真係冇喎。點吓頭囉。

記:是否還未接受女兒這段婚姻?
吳:每一個人選擇嘅嘢,我唔會批評啱定唔啱,但我都話有我底線喺度。唔係接唔接受,而係你一定要去接受,因為嗰個係一個個體,唔理你個仔又好女又好,老公又好老婆又好,都係一個個體,冇得畀你接受唔接受㗎喎。你一定要去接受,只係你自己點樣去消化嗰件事,唔代表我要喜歡或者唔喜歡,我唔會答你我喜歡或者唔喜歡,因為呢個唔係我選擇,係你(卓林)個選擇嚟㗎嘛。

記:愛一個人會包容身邊的人,若你錫女兒,該會接受她另一半,例如王賢誌父母也接受他同性婚姻。
吳:其實唔關同唔同性事,觀點與角度,我反而覺得同同性婚姻冇乜關係。

記:到這一刻也未接受到Andi?
吳:(思考了一輪)唔會諗囉……唔係到你揀,譬如香港越嚟越多人,或者越嚟越貴,呢樣嘢唔係你揀㗎嘛。你只可以去包容、去接受,冇得話唔想咁樣,我想咁樣,邊有得畀你想定唔想?你只可以諗第個方法,同埋去消化件事,解決問題。我會同個女溫馨提示,乜嘢係好,乜嘢係唔好,你已經冇得話啱與唔啱,我唔係針對任何人,我只係以事論事,我覺得咁樣係最舒服嘅,你所有朋友我都接受,不過我會話畀你聽,如果咁,可能會咁㗎喎。

記:跟卓林有否保持電話聯絡?
吳:我會留言囉,佢會睇。我覺得有啲嘢唔好去到一個執着,如果執着佢唔覆我電話,我覺得做乜都好,我學到一樣嘢,所有嘢都係盡做,你問心無愧,你做到嘢、諗到嘅就做,但係用一個溫柔少少嘅方法。唔好諗點解我同你咁客氣,做乜你畀個咁嘅反應我呀?唔好諗呢啲嘢,呢啲係多餘,諗多咗,咁你會開心好多。

記:去年卓林與Andi欠租被追數,結果驚動警方,你要出手解圍,現時仍有給卓林零用錢?
吳:你要讀書嘅,學校老師喺度,但你要唔要做呢樣嘢,係你嘅選擇,我迫唔到你。屋企你要返嚟嘅,你隨時都可以返嚟,我覺得每一個成年人都有佢自己嘅崗位去做自己應該做嘅嘢,你要讀書,做到嘅嘢我會做,我頭先都有講底線嗰樣嘢,通常啲阿媽都會諗多咗,我唔去講,咁邊個講呢?返番去頭先講嘅嘢,應該畀嘅我會畀。

記:卓林早前表示自己現時有兩份工作,生活費自己負責。
吳:我覺得係人生經歷嚟,每個人要經歷一啲嘢,你先學到一啲嘢。人係需要有經歷嘅,你經歷入面先至會長大,你經歷可以諗歪咗,但經歷亦可以令你正面咗。你控制唔到任何一樣嘢發生,控制唔到任何人、任何一件事,你唯一控制到係你自己,如果當你自己唔正面、唔定嘅時候,你係幫唔到任何嘢嘅,你要畀佢自己試,畀佢自己經歷,冇人想唔開心嘅事發生。

記:可覺得「有事就媽咪,冇事就nobody」?
吳:我又唔覺得係囉。我唔係幫自己個女講嘢,其實我個女好乖,不過好容易受人影響,同好容易受感動。佢係一個好乖嘅細路,咁人係會有壓力㗎嘛,只係大家年紀唔一樣,我年紀大過佢,經歷多過佢,我曾經有段時間都好似佢咁樣,由16歲到26歲呢段時間。
除非你屋企好似粵語片年代咁10幾個兄弟姊妹,一家人等住你去養,咁你就3歲識煮飯,如果唔係你16歲到26歲,你未結婚前或者你冇細路哥你冇負擔冇壓力嗰陣時,你唔知自己做緊乜嘢,再加埋身邊會有好多唔同嘅人影響你,係要去到某個年紀,你先至冇咁俾人影響。即係我唔係幫個女講嘢,但我由細到大係會俾人影響,你係去到某個位,你先會發覺企返喺自己度諗,每一個人最後負責任係你自己,係對你自己負責任,呢個都要係你生活成長過程入邊去慢慢體會慢慢學。

記:早前台灣有傳媒指卓林與Andi分手,又指Andi要爭成龍數十億港元家產。
吳:其實我冇睇新聞,我唔想評論別人。

記:感情生活dry足多年,可希望找個伴?
吳:我覺得所有嘢都係可遇不可求,我又冇唔畀機會人,又冇特別去搵,你話我變態又好乜都好,呢樣嘢都係順其自然好啲。

記:完全沒有人追求約去街?
吳:唔係冇嘅,想去、唔想去……成條街都係人,我又唔會專登去搵個人去拍拖,你話搵個伴好啱傾嘅,大家好志同道合嘅,我會希望搵到㗎。但你唔會想搵個返屋企同你嗌交,大家價值觀好唔一樣,細個拍拖,同而家想搵嘅係兩樣嘢,愛情可以係盲目嘅,個個細個都係咁,盲咗咁,細個拍拖會咁嘅。

記:難道現時心理和生理也沒此需要?
吳:睇吓你個心態囉,你自己要balance,而家搵個人返嚟氹吓我,其實好易。

記:難道一世女不渴望穿婚紗行婚禮?
吳:邊個唔想買六合彩中,我諗冇人唔想、唔要贏,感情係要去經營,你要遇到一個啱嘅人,呢個年代你唔會拍過一次拖,梗有一次兩次,你細個拍拖基本上係盲㗎嘛,啱與唔啱你都係盲㗎嘛。我呢個年紀唔係細個,你唔想去麻煩自己,好似睇新聞,我唔睇,我淨係做我要做嘅嘢,唔好影響到我,感情我都係同一個處理方法,如果我遇到個好啱傾嘅,大家可以傾到偈,可以維持到,大家可以令大家開心嘅。如果唔係工作上合作,完全冇任何利益衝突下嘅朋友,我覺得去到某一個年紀,你係會還擇嘅,你唔會想帶麻煩畀自己,其實同男朋友一樣。

記:對男朋友和結婚對像,Elaine似乎幾揀擇。
吳:我覺得係要,人生苦短,到你26歲時,你會唔想嘥時間,唔好嘥時間去諗無謂嘢,唔會想搵個人同你嗌交。

記:近年有沒有跟成龍聯絡?
吳:(瞪大眼笑)除咗我自己、我個女,你問我屋企隻貓,啲關我事嘅嘢,我會答囉。

採訪:魯吉
攝影:林賓尼
攝錄:馮嘉銘

化妝及髮型: Aimie Cheung @MOD makeup academy
服裝: I.T、 Giuseppe Zanotti

------------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9

-------------------------------
錶迷必讀!
89頁腕時計電子書 66款嚴選年度新錶
https://hk.adai.ly/e/v7jEA0MC1X

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載