› 選擇地區
三藩市
紐約
洛杉磯
其他美國地區
香港 台灣 北美
 
2019年08月12日

【果燃台最新上架】編輯推介《三條窄路》毓民智叔開咪惹禍 蔣祖曼同王祖藍細佬聯手抗黑警

最後更新: 0820 23:30 / 建立時間 (HKT): 0820 00:00

「果燃台」 本周推介,最新上架-- 《三條窄路》 獨立電影人崔允信,呈現從財團到警方到傳媒的政治糾葛。崔允信是獨立電影人團體「影意志」之藝術總監,亦是創立人之一。「影意志」曾發行多部獨立電影/紀錄片,其中包括 果燃台   熱播中的《地厚天高》《亂世備忘》

【以下內容純屬處構.如有雷同實屬巧合】

同大部份人一樣,我只係普通市民。香港支旗由藍色變紅色嗰年,我仲讀緊小學。

6277成日話,香港樣樣嘢都咁離身,中環嘅管治班子佢冇份選,但要恆常地被予以譴責;西環就鍾意恐嚇,「後果自負」、「全社會都要埋單」。萬億大白象工程,咪又係香港人埋單。

6277係我個前警察老友,朋友嗌佢薄唇版王祖藍。佢冇當差好耐喇,衰爛賭,做咗超齡蠱惑仔。我識佢十年,佢十年前已經話,當差唔代表係好人。佢以前個手足仲當緊差,hea做,貪佢好pay啲,所以6277好放心喺佢面前幫人落注買外圍波。

呢個差人朋友,有次塞咗包丸仔畀佢,係喺蠱惑仔身上搜到,佢當人情咁送咗畀6277。結果包丸仔竟然幫6277呢個過氣差人破咗單殺人案。咁上心,因為6277鍾意嘅GiGi係單案目擊證人。佢做「一樓一」嘅。依家嫁咗人喇。

聽起上嚟好超現實,但現實往往就係咁超現實。

單嘢真係有十年喇。有間叫利港嘅上市公司,想收購一間公司,好似叫金華,金華喺大陸嘅廠偷工減料、仲發生大爆炸,流出有毒物質污染水源,好多村民中毒。有關方面想冚住單嘢,就連幫村民診治嘅醫生都軟禁埋。

至於點解搞到殺人,6277話係因為香港有個律師,捉住兩間公司嘅痛腳想鑿利港一筆,結果成為咗兇案嘅dead body,過程俾GiGi見到晒。律師個partner(好似姓嚴),俾利港老闆屈咗穿櫃桶底兼係兇手,惟有著草去搵馬牧。

馬牧真係牧師嚟,成日喺電台開咪鬧政府,弟兄姊妹都想佢收聲,有個離譜到話馬牧累佢冇咗單大生意。不過馬牧唔聽人勸,收留姓嚴嗰個,搞到黑社會包圍教堂攞人。班警察呢?最需要佢哋嘅時候就唔喺度,唔要佢哋嘅時候先到。

最離譜嘅係,6277話,佢個前上司根本一早有晒利港罪證,但怯於人家財雄勢大,上司吞料冇上報。佢最後有冇俾老廉查就唔知喇。

單案仲牽涉一個新入行嘅女記者,個樣幾似藝人蔣祖曼㗎。案發當日佢都跟蹤利港個老闆S Ho,博影到張攬女相做封面。後尾利港老闆同佢總編擺「和頭酒」,塞咗幾千蚊畀個記者叫佢收聲,連攬女啲相都deleted埋。

真係眨下眼過咗十年,以前周刊仲好好賣。聽講破咗案拉咗人之後,行內一度流傳女記者向總編爆seed嘅金句:「我唔係想做好呢份工,而係想做啱一件事!」呢句用喺今時今日,真係喊出嚟。

香港街頭依家變咗戰場一樣,冇委任證嘅疑似警察武力驅散群眾同傳媒,我睇直播,已經唔係驅散,係無差別襲擊。催淚彈,仲要係過期,乸肺;啲手腳起晒水泡,中咗毒氣咁。早兩日有個差人,6277話係「士沙」,拎支雷明登長槍喺港鐵站指住啲市民,手指仲扣住扳機。

呢兩個月好多香港人發噩夢,有晚6277都跟人發夢,成身催淚彈味。佢話見番嗰個差人朋友,雖然冇戴委任證又full gear,但6277一眼就認得佢。

後尾6277俾人帶咗去一間通宵開放嘅教會,進了窄門,原來裡面好大,乜人都有。有人祈禱,有人幫手機叉電,有人坐喺地下發呆,身上嘅血迹唔知係佢嘅定係人哋嘅。大部份都係後生仔女。6277一入到去,有牧工主動畀杯水佢。6277一接住,喊到隻狗咁。走嗰陣,牧工仲提佢:「要小心呀!」6277又喊。

馬牧師在電台節目中說︰「當進窄門。因為引去天國的門是窄的,路是小的,找著的人也少。」

唔記得介紹自己,我叫GiGi。
===============
《蘋果》「果燃台」最新上架、崔允信執導電影 《三條窄路》 ,2009年在港(被迫)作有限度放映,全港僅一間戲院上映,每日只放一場。戲中有不少熟悉面孔,包括馬牧廖啟智、名嘴黃毓民、6277由王祖藍胞弟王亦藍飾演,女主角是蔣祖曼。張頴康飾演6277的警察朋友,何華超黃伊汶亦客串一角。王武霞飾演GiGi。

上文部份情節及人物,節錄自 《三條窄路》

「果燃台」 只限升級壹會員閱覽,立即成為升級壹會員!
-----------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載