› 選擇地區
三藩市
紐約
洛杉磯
其他美國地區
香港 台灣 北美
 
2019年08月13日

【曾過勞入院】關智斌演唱會開賣反應好 自己都要諗方法撲飛

攝影︰陳慧安
建立時間 (HKT): 0813 17:02

關智斌(Kenny)、顏卓靈、陳友、白只及羅子喬等,今日去到荔枝角為電影《任性的你》進行開鏡拜神儀式。正忙於籌備演唱會的Kenny,前日因為過勞而入院,Kenny說︰「以為自己有無限意志,冇諗過身體承受唔到,為準備演唱會,每日起碼排練6樣嘢,做運動、排舞、練歌、跳舞及練氣,但係前日突然頭暈、胃痛,食完胃藥起身企唔穩,同事即刻帶我入院,因為血壓同血糖低,最近自己食得好清,完全冇糖份,同時又發燒,所以入醫院打咗支針退燒,唔使住院。」Kenny指容祖兒得悉他入院,隨即傳短訊給予鼓勵,Kenny說︰「Joey話佢第一次開演唱會都係咁,佢同我講唔好覺得自己係超人,總之上到台,健健康康、精靈、開心就夠,出院後即立刻飲杯熱朱古力補充體力。」

Kenny指近兩個月對他來說是人生特別日子,他說︰「好戲劇性地開演唱會,而今次又有一個度身訂造嘅電影角色,演唱會同新戲拍攝重疊時間,不過劇組幫我安排,畀我喺演唱會之後再繼續拍攝。」Kenny演唱會今早公開售票,Kenny說︰「因為冇內部認購,公司事前同我講啲飛搶手,知道賣晒飛都受寵若驚,公司同事話好多人要訂飛,我屋企人同朋友加埋都要300張,自己今朝同同事上網撳飛,但係只係撳到十幾張,要叫公司再諗其他方法。」

問到Kenny有冇同張致恆(Steven)聯絡,Kenny說︰「近排好少,到時睇下佢心情點,睇下佢到時喺唔喺香港嚟睇。」對於知否Steven下個月結婚,Kenny說︰「知,佢好似想低調,等佢自己講,我去唔去睇佢安排。」

同場的顏卓靈今次飾演女歌迷,與Kenny有親熱戲,顏卓靈說︰「自己喺戲中好迷Kenny,今次做一個啞嘅角色,需要學手語,自己事前返一個月學習手語,手語令我更易容易明白戲中對白。」對於與Kenny有親熱戲,戲中有份演出的男友白只會否尷尬,顏卓靈說︰「我完全唔擔心,我哋都係專業演員,佢睇劇本都知道我有啲咩要拍。」

採訪︰張明

------------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載