› 選擇地區
三藩市
紐約
洛杉磯
其他美國地區
香港 台灣 北美
 
2019年08月14日

【影帝級較量】張家輝任賢齊拍戲拳拳堅打 同荷李活導演合作有新鮮感

建立時間 (HKT): 0814 06:00

張家輝和任賢齊(小齊)早前在黃竹坑為主演的電影《沉默的證人》接受訪問,二人曾在電影《大事件》合作過,15年後再度合作,家輝指小齊跟以往沒有太大的分別,只是對他更了解,他說:「小齊有一個自身性格令大家咁鍾意佢,佢個人冇乜所謂,一個大好人,直至今次再合作,嗰份感覺,依然冇變,一樣咁隨和,好認真工作,又增肥又減肥,睇到佢好努力。」小齊表示很榮幸可以跟家輝學習香港演員精神,「今次學到好多嘢,演員投入角色之後,眼神同講嘢方式,仲有鋪排,家輝控制得好好,所以對戲嘅時候好過癮,好開心,我覺得家輝深不可測,佢嘅眼神好似可以透視你咁。」家輝笑說:「唔通我養咗幾隻鬼仔又話你聽咩!」

小齊在戲中飾演匪徒,家輝則扮演法醫,小齊說:「今次做反派,我要同自己講,做乜都係啱,喺戲入面,我要追求好日子,所以要不擇手段去做,但就撞到一個死都唔屈服嘅法醫。」他指除了有打鬥戲份外,家輝更會看穿匪徒們的身份和心理,從而令他們內訌。家輝不是飾演法醫嗎﹖他笑說:「我讀得書多嘛,呢個角色設定係當屍體係朋友,同屍體有溝通,因為呢個法醫嘅太太喺大劫案中無辜被殺,於是就背負着一啲陰影,變咗好孤單,一直以工作為樂,所以佢有好強嘅分析力。」

提到導演是《虎膽龍威2》的Renny Harlin,家輝表示對方承接該戲的拍攝風格,「我哋呢個故事係發生喺法醫大樓,我一直被小齊追殺,又有逃走,我又會設機關陷害佢,途中亦有好多西方嘅幽默感,例如有醉酒佬郭晉安走入嚟,又有MC Jin,佢帶住耳筒,聽唔到我叫佢報警。」戲中有大量動作戲,小齊直言難度不高,但痛楚度卻很高,「其實都係打爛仔交,我打到唔忍心再郁手,但家輝叫我嚟多個,好似最後一場大打出手,打到我自己都有啲暈,因為我哋係堅打,有個鏡頭係我一腳踢家輝落去,導演同動作指導都話ok,但家輝話不如嚟多個。」問到家輝有沒有受傷﹖他說:「我有墊嘢,我會評估嗰個動作自己能唔能夠應付,有把握先會去做。」

小齊坦言這就是香港精神,拳拳到肉。香港導演與荷李活導演有何不同?家輝指荷李活導演的節奏會明快,在商業角度方面,亦有他們的一套,「有佢哋老外式嘅幽默感,今次係好好經驗,可以接觸唔同文化嘅交流。」小齊則說:「我接觸過嘅香港導演係飛紙仔,隨時調整劇情嘅發展,呢個係比較隨意嘅創作,瀟灑,但荷李活導演就好精準,計算埋觀眾嘅心情起伏。」曾經執導幾部電影的家輝,直言不會干涉導演的拍攝,「關我咩事,我會企喺演員位,人哋作者想點,你都要尊重。」

採訪:黃曉妍
攝影:陳慧安
場地:海洋公園萬豪酒店

------------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載