› 選擇地區
三藩市
紐約
洛杉磯
其他美國地區
香港 台灣 北美
 
2019年08月24日

【政治審查】耕耘19年冇情講 無綫員工爆料因一張相被炒:CCTV影到咪「鋸」咗我

建立時間 (HKT): 0824 19:00

無綫電視廣播有限公司(TVB)昨日突然解僱約20名員工,傳被炒員工均涉及反送中言論,並會有下一波再炒人,令公司瀰漫一片白色恐怖。無綫行政總裁李寶安昨日回覆《蘋果》指裁員是受本港市場不穩和政治動亂拖累,對前景構成隱憂,有需要調整業務和小量精簡人手,亦不清楚個別員工的私人行為。

相關新聞:【為人民幣服務】傳李佳芯被易角 無綫直認有藝員引發內地觀眾敏感情緒

表面上理由充份,但今日就有一位昨日被炒的員工梁先生向《蘋果》踢爆謊言!梁先生透露自己在無綫工程部工作19年,即使沙士及08金融海嘯裁員,自己都能安然度過,想不到今次會捲入政治風波。梁先生說:「我係影過一張相,之後俾人放咗上連登,其實我只係喺WhatsApp group畀家人朋友睇,齋影都冇罷出嚟(社交網),但就俾公司嗰個24小時、全天候無死角嘅高清CCTV影到,跟住就『鋸』咗我。」

梁先生當日所影的相,其實是8月2日貼在公司上一張內部通告,提醒員工「將有不合作運動發生,如沒有合理理由不依時上班,一律當曠工及嚴肅追究」。梁先生揚言:「其實我係冇罷工(8.5),影張通告都只係想話畀屋企人聽,我參與唔到罷工呢啲咁敏感嘅嘢,不嬲都唔係特別激進分子,可能只係暗黃。」會否覺得很無辜?他說:「冇感覺,意見上冇乜嘢想發表,只係想講番件事。公司炒人原因係貿易戰經濟唔好,公司架構重整,哈,都係例牌嗰啲啦。信唔信?你話呢?儍豬嚟,我哋根本係冇可能裁員炒到我嗰一批,2016年仲有得升職,做得耐有經驗,人工又低,價廉物美去邊度搵。」

會否希望香港的政治風波盡快平息?他說:「我冇乜特別意見,個個都想盡快平息,或得到自己想爭取到嘅嘢,但我都唔想再被人抨擊,只係想反映件事。」提到未來日子,他直言未有打算,苦笑說:「休息吓,做廿年都悶同攰,咁佢(TVB)都有一個月補番畀我。」

至於另一位任職於節目部的工作人員陳先生,亦因為拍攝了一張公司3樓控制室落閘的相片,最後同樣被解僱。陳先生接受《蘋果》訪問說:「我嗰日影咗張落閘相,就放落一個同事之間嘅WhatsApp group,原意係提醒同事要兜路走,但我唔為意個group有一個同事已經離職,去咗一間傳媒做,佢唔小心擺左張相,冇諗過後果咁嚴重。」陳先生指之後公司查出相片由他影,他說:「我8月頭開始就乜都唔使做,前日被解僱。」

------------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載