› 選擇地區
三藩市
紐約
洛杉磯
其他美國地區
香港 台灣 北美
 
2019年09月09日

【住咗23年】馬浚偉自豪係「深水埗仔」 街坊鍾意先有存在價值

建立時間 (HKT): 0909 06:00

連月的逆權運動,深水埗成催淚彈放題社區,變得氣氛緊張。

現年47歲的馬浚偉,人生前半都在深水埗成長,自稱「鐵一般嘅深水埗仔」的他,至今仍不時重返成長地,尋找舊日的足迹。訪問這天,馬仔就帶着正能量出現,受到區內男女老幼街坊歡迎,有的要求合照,有的要求自拍,馬仔全部來者不拒。

生於基層家庭的馬仔,爸爸是九巴車長,媽咪是製衣業工人,他是家中唯一男丁,上有三姊,下有一妹,一家七口住在白田邨公屋,馬仔由幼稚園、小學到中學都在深水埗就讀。「從小行路返學、放學,平常生活都喺附近。」馬仔中三開始就要去尖沙嘴雪糕站做兼職幫補家計,賣足3年,中學畢業後本可以入讀理工修讀設計,但因為交不起學費被迫放棄機會,馬仔投身社會工作,他做過出版社和在化工廠賣塑膠。年少時的馬仔從沒想過長大會做藝人,他記得小時最大興趣是畫畫和唱歌,入不到理工已沒再畫畫,但他卻沒放棄唱歌的興趣,仍屢敗屢戰參加各大小歌唱比賽,終於在93年參加「第3屆先鋒歌唱比賽」中奪冠,繼而成為踏腳石加入娛樂圈,以歌手身份出道,幾年後變成電視小生,演藝路反更暢順。

在深水埗人氣測試中,街坊異口同聲都對馬仔說「我好鍾意你演嘅電視劇」、「你套套劇我都有睇㗎」,看來他迷暈「師奶」是演技,並非歌聲,大家早已淡忘他曾是歌手,「我已完全接受,大家當咗馬浚偉係演員,只係話佢係電視台小生,好多戲都係佢,大家認識我係演員,佢哋可能都知我有唱劇集主題曲,但唔知我曾經係出碟嗰種歌手,我都慣咗喇!真心講,而家藝人係冇分乜嘢層面,佢哋可以係演舞台劇、可以係演電視劇、可以係拍電影、可以係做主持、可以係做DJ,我乜都有做,咁樣反而係闊咗,我哋多咗選擇。」

有人說觀眾是藝人的「米飯班主」,馬仔也樂於跟熱情街坊互動,「我成日同啲新入行嘅(後輩)講,街坊認得你,同你影相打招呼,你要好好珍惜,街坊鍾意你,我唔會嫌人哋擁住,千祈唔好偷偷影我,因為唔靚仔,只要大家過嚟叫我,一定同你影,無論自拍又好,點都得,冇所謂。觀眾同街坊鍾意你,先有存在價值,亦證明你演藝生涯冇白費。如果出到街,觀眾唔想同我影相,見到我就雞飛狗走,咁我要檢討吓。我自問到而家都只係一個普通人,藝人只係職業,將我睇高少少咪係一個表演者、藝術家,無論我唱歌、演戲、做舞台劇、甚至導演都好,我而然係深水埗嗰條𡃁仔。」

到底深水埗有甚麼事令馬仔最難忘?他衝口而出:「淨係『深水埗』呢三個字都夠難忘啦,我出世到23歲冇離開過深水埗,呢度係我第一娘家,感情特別深,我讀書嘅年代,深水埗比較貧窮,真係幾基層,我大個咗,入咗娛樂圈,生活改善咗先同家人搬離呢區。不過我對呢度心態係冇離開過,我都知而家社會氛圍,大家好緊張同唔開心,人與人之間距離遠咗,無論係點,我唔會抗拒嚟深水埗。我每日都有睇新聞,每日都禱告,我冇足夠智慧去分析而家嘅情況,但我愛呢個地方,無論發生乜嘢事,我都唔會離開香港,唔會離開我成長嘅家。」馬仔已有多個計劃出錢出力幫助各區的弱勢社群,他說:「既然社會同電視台畀咗知名度我,而家我都唔細,唔係只想發展自己演藝事業同生意,我想直接走入社區做多啲活動,回饋社會。」

馬仔將於10月底到11月初在灣仔演藝學院舉行共7場的「Dream Big馬浚偉演唱會 2019」,這是他入行26年的首次個人演唱會,他近日已埋首準備,他表示:「每年我喺美加登台時,都會唱10幾、20首歌,都算演唱會形式,今次個人名義開騷都冇乜嘢難度,平日都有練氣。」馬仔反而覺得揀歌最難,尤其近日大家都提着他唱過的《放學ICU》主題曲,「太多歌想唱,好辛苦篩剩20幾首,我都應大家要求,已經同音樂總監講要cut一首歌,插番《放學ICU》入去。」問到演唱會的賣點?馬仔笑說:「賣點……大家唔好諗我會賣肌肉同舞蹈,呢啲唔關我事。今次舞台我幾揼本,設計咗video wall,好多電腦效果,今次音樂感好重,大家嚟兩個半鐘嘅騷,好多歌會令佢哋有好多回憶,我仲會想同大家傾吓偈,我想令大家開心番啲。圓形嘅catwalk,我可以行好近,觀眾前面咁滯,可以落去握手,甚至企佢哋面前唱歌,我唔會忽略任何一邊嘅觀眾,我肯定每晚入場嘅600位觀眾,我都會照顧到,肯定見到晒,如果話6,000位我就照顧唔到,即使我話照顧到都係呃你啦。」演唱會主題叫「Dream Big」,故名思議有一個環節讓人追夢,馬仔挑選了4組有演藝潛質的素人,屆時上台一展所長,他們同時有機會與馬仔互動。

馬仔走入深水埗社區閒逛,最後一站到老店吃豆腐花和煎釀豆腐,獲店員熱情招呼,馬仔一邊吃豆腐花,一邊說:「某程度上係童年回憶,味道點都會唔同,人都唔同晒,起碼感覺係一樣,佢哋豆腐花仲係好出名同好好味。」馬仔又與鄰座街坊閒話家常,看到食客川流不息,他又貪玩客串幫手,最後更買了多瓶腐乳,馬仔推介:「送粥最正。」

採訪:比華利
攝影:仇志德
攝錄:廖達燊

-----------------------------
【撐學生】
召集有心人 撐學生全年睇《蘋果》
立即按此

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載