› 選擇地區
三藩市
紐約
洛杉磯
其他美國地區
香港 台灣 北美
 
2019年09月09日

【真.香港小姐】撐反送中即Out 「夠薑港姐」梁敏巧:港姐?不了

最後更新: 0909 16:53 / 建立時間 (HKT): 0909 16:24

逆權運動遍地開花,被鬧爆CCTVB的無綫昨晚繼續歌舞昇平,在將軍澳電視廣播城舉行新一屆港姐選美。今屆又玩新賽制,只有10位佳麗進入決賽,節目未到一半,10位佳麗換完水晶泳裝已即時淘汰2位,連答問環節都冇得玩。

當中被指是黃絲的3號梁敏巧(Maggie)是首輪被踢出局的佳麗之一,另一位是9號廖倬竩。有連登仔立即開post,表示好戥梁敏巧唔抵,讚她才是「真.香港小姐」,還有好多支持者在她的IG留言:「你先係真正敢言嗰位港姐,未來嘅路加油啊」、「香港人心目中嘅冠軍」。

不過,無綫最近陷入白色恐怖,一日炒近20名支持反送中的員工,連視后李佳芯和田蕊妮都被迫封口,相信也是梁敏巧無得留低的原因,梁敏巧想入無綫做藝員似乎機會好渺茫,她今日亦在IG留言,直言志不在此:「港姐?不了,咪玩啦。由細到大都俾人笑我大份、方臉、眼細,我唔係一個靚女,有自信、有表演慾、發明星夢嘅人。有人覺得港聞記者同選美九唔搭八,有人講過唔少人25歲已死,我唔信,我亦唔覺得要畀份工作困死,我鍾意冒險、挑戰、刺激,想要一個趁後生先可以做,不一樣嘅經歷,有諗過去working holiday,但唔捨得香港。我真心覺得自己好夠薑,其實我入到複選都已經好叻,但我入到決賽喎,贏咗啦!感謝身邊每一個幫我、支持我、鼓勵我嘅人,多謝梳化、保母、台前幕後工作人員,多謝你哋包容、鼓勵同支持。特別多謝爹哋車出車入、準備食物,心靈輔導我,24歲,我又成長了。」

梁敏巧是新聞系出身,據聞求學時期要做三份兼職,包括教琴、marketing和sales來幫補學費及生活費。梁敏巧畢業後亦投身做記者,2014年的雨傘運動都有參與,當年曾在IG留言:「充實的一天,禾艾(我愛)做記者。」梁敏巧真的好熱血,有指她去完港姐初選第二日仍然要開工「扑咪」,612金鐘遊行後爆發警民衝突,梁敏巧亦身處現場採訪,慘食催淚彈和胡椒噴霧,同日她在IG寫下感言,見證年輕人抗爭受傷,亦不忘相救,辛苦記錄每一刻的記者,包括她自己。

而為參選港姐,梁敏巧要辭退記者工作,但期間仍不忘關心香港,說:「近來網上有八個字我非常喜歡,『兄弟爬山,各有各做』,完全道出一個社會應有嘅元素---理性思維,廣闊胸襟及開放的態度去討論每件事。每個人都有不同意見立場,我們不是機械人,無可能要求所有人思想一致。我相信每個有獨立思考能力,明白行動所帶來嘅後果……願港人仍可擁抱自由民主、人權法治、公平公義、多元包容、尊重個人和恪守專業。」

-----------------------------
【撐學生】
召集有心人 撐學生全年睇《蘋果》
立即按此

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載