› 選擇地區
三藩市
紐約
洛杉磯
其他美國地區
香港 台灣 北美
 
2019年09月19日

【啱就行出嚟】吳日言大讚學生勇敢抗爭 無懼山頂生意慘淡

建立時間 (HKT): 0919 06:00

由6月初的反送中直至今日的逆權運動,香港營商環境變差,近月來店舖出現「結業潮」。吳日言(Yan)經營的兩間食店正面對今次逆境,尋找救亡方法外,同時以積極態度面對,除照原定計劃下月開旺角店,更希望在現時環境找到平、靚、正的舖位開第四間分店。Yan認為香港人曾克服過無數難關,千萬不要被困難嚇倒,逆境必能跨過。

吳日言和老公Barry及幾位好友去年12月底合資超過七位數,在銅鑼灣開設第一間食店,今年6月再投資近七位數在山頂凌霄閣開分店,但山頂店開張便遇上香港發生反送中,發展到現時的逆權運動。由於特區政府冷漠回應市民訴求,迫使示威者上街抗爭,影響社會環境及經濟,結果近月店舖出現「結業潮」,令老闆們要各自諗計救亡。

Yan銅鑼灣店的客源主要來自學校及寫字樓,學校午飯時試過一小時內賣了80個便當,暑假時店舖變陣主力做寫字樓外賣,如果生意好每日有過萬元營業額,即使較靜的日子也有兩、三千元。但山頂店卻完全不樂觀,租舖前業主指每日有過萬人坐纜車到山頂,但現在商場每天只有幾十人來來回回,Yan說:「租山頂店前我哋有問隔籬店舖生意點,佢哋話日日都過萬蚊,高峯時仲唔止,維持咗十幾年。我間舖喺正旅客落纜車必經之路,心諗如果每日有一千人幫襯買支水,生意已經唔錯,但呢幾個月好嘅只有七、八千蚊,最差真係試過只有三百幾蚊生意咋。」

Yan坦言社會動盪對銅鑼灣店影響不大,因他們的食品售價平,現時大家不願花費太多,他們這類小店反而有得着。但山頂店客源主要是遊客,現在遊客銳減,首當其衝大受影響。為求出路,Yan向業主要求減租:「呢個商場係一個集團嘅物業,佢另一個物業係尖沙嘴一間五星級酒店,聽聞而家酒店減到幾百蚊住一晚。負責人話可以幫我傾減租,但佢都笑話自己唔知會唔會被炒,到而家仍未收到回覆。」

山頂店生意不濟,Yan和老公坦言有做了最壞打算,迫於無奈惟有結業:「最壞嘅情況一早已經諗,所以我哋先專揀細舖,舖內啲雪櫃、收銀枱等全部外置,可以搬走再用。」

雖然前景不明朗,但Yan夫婦及其他股東表現積極,第三間分店會照原定計劃下月在旺角開張,而且會籌備擴充再開第四間:「大家唔好俾難關嚇親,我哋覺得而家啲舖租跌,可能會有啲又平又靚嘅舖位。當然想香港經濟好返,遊客可以再嚟,可能隨時亂世出英雄,另有新嘅商機,自己唔會氣餒,香港人有乜挫折難關未經歷過,我哋會堅持。」不少老闆會埋怨抗爭者示威搞亂社會,才令他們步向「結業潮」,但Yan認為香港大家都有份,每人都有權利爭取訴求,她倒認為如果有人一早聆聽市民聲音,去面對、去商討,事情有機會簡化及解決,她更以媽咪口吻說:「一個大人仍未解決到啲問題,反而去怪責啲小朋友,大人同小朋友溝通係好重要。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載