› 選擇地區
三藩市
紐約
洛杉磯
其他美國地區
香港 台灣 北美
 
2019年10月10日

【憑良心做事】《東張》林泳淘愧受「民主女神」稱號 每見學生被打心痛難眠

建立時間 (HKT): 1010 06:00

一條《逃犯(修訂)條例》令香港陷入半癱瘓,社會瀰漫一片白色恐怖,在社交媒體遇上不同政見,便有機會被「祭旗」。

林泳淘(Wingto)是90後女生,今年29歲,參加《2012年香港小姐競選》晉身娛樂圈,一出藝訓班便加入《東張西望》做主持,一做便7年。今年3月,泳淘因為反對《逃犯修例》,在IG出post呼籲人上街遊行,怎料成為禍根,上月底突然收到公司電話,要即時解約。「當初真係冇諗過咁大件事,我係日日睇新聞,基本上只鍾意睇時事,睇見呢個條例,我好驚喎⋯⋯我唔係專業,但有幾點覺得好可怕,尤其其他國家嘅人嚟香港,都可能會被帶走一啲佢哋覺得所謂嘅政治罪犯。以前香港人比較政治冷感,既然我睇到就希望推吓大家,但並冇話要針對任何嘢,有人話你係呢邊(黃絲),但香港人從來冇覺得反呢條條例就等如港獨,大家只不過想要一個自由安全嘅香港。」

泳淘欲言又止,因為受訪前,不少朋友都勸她避談政治,但她卻希望能本着良心做事。提到前線勇武,更甚是十餘歲的小朋友,更是令人心酸,她眼泛淚光說:「嚟到而家,成件事係好心痛⋯⋯你見到好多新聞,或者好細個小朋友俾人打,咁先會令我覺得,我只能默默去幫人,而唔可以好出面咁同人講,因為人哋要出嚟遊行或者做任何嘢,係人哋嘅選擇,唔應該出自我把口,如果人哋有咩事嘅話,我覺得呢件事係唔啱。」這幾個月,每晚有抗爭都會令她徹夜難眠:「因為我會睇通頂,每次都會問點解,良心,係人類最後嘅把關,我只可以咁講。」

被外界封做《東張》民主女神,泳淘坦言受之有愧:「每次聽到,都希望大家千祈唔好咁諗。呢件事上我冇做乜嘢,只係一開頭叫人留意,同朋友share吓,但冇真正做到好似佢哋(前線)咁,佢哋先至係真正努力嘅人,自己付出嘅努力遠遠追唔到佢哋,唔好咁嗌我,真係自愧不如。」泳淘只能叫大家「Be Water」:「我唔會批評前線啱定錯,但面對防暴喺對面,咁不如你哋走啦,我真係好心痛,睇住Live,打佢哋就好似打自己一樣咁痛。」

成為失業大軍,泳淘不擔心將來冇工開,反而安於天命,說:「Touch wood真係冇嘢做,香港地咪去7仔打工囉,應該餓我唔死嘅。」泳淘自言非大富之家,幸有家人疼錫,還有一位拍拖12年的初戀男友,她一臉「冧滋滋」說:「我打畀佢(男友)話我俾人炒咗,佢話『天呀,咁我今次真係要養你喇』,我話『係呀』,哈哈。養唔養得起我?平有平養,貴有貴養啦,我冇所謂。」

泳淘自爆是女追男,大讚男友100樣好:「當年考完中五,去聖誕舞會見佢好純,唔係靚仔,但一個人坐喺度唔出聲好可愛,我就撩佢玩,之後發覺佢好好。我喺佢身上學到好多嘢,拍拖咁耐從未見過佢發脾氣,或者講人壞話。」她坦言初入行時不想令fans失望,所以不公開拍拖,現在亦希望保護男友,她說:「始終係圈外人,我有時出街都好驚俾人認到,反而佢冇所謂,成日叫我唔好咁執着,人生好短暫,要活得開心,睇吓發哥活得幾自在。」

除了民主女神,擁有33D豐滿上圍的泳淘亦有《東張》咪神封號,她苦笑說:「拍《3日2夜》着泳衣出鏡,年紀大咗,而家諗番係咪黑歷史,有咩新聞都係cap張想當年圖。」泳淘自言是保守派,當年參選港姐亦是半推半就,她說:「媽咪係一個好傳統嘅女人,但佢竟然話『有乜所謂呀,你咪畀人睇一次囉』。當年我啱啱讀完書,冇嘢做,屋企人想我去英國讀書,咁啱嗰年就係去英國拍外景,屋企人就話有得去英國旅行,賺咗啦,好市儈,哈哈。」同屆落選港姐楊斯雅,早前在網上爆料指有圈中女星「做雞」或被包養,泳淘表示不敢肯定,但承認自己inbox亦有收過問價短訊:「試過話30萬同你食餐飯,唔應就一路加上去,我覺得冇需要回覆,唔覆佢唔會煩你。但有時同行朋友都會講笑,原來我咁值錢㗎!」

未來路長,泳淘坦言最不捨得《東張》一班同事,她說:「大家好似屋企人,每星期見4至6日,真係最掛住佢哋。有時做《東張》要兼顧拍劇,真係試過做訪問時太攰,喺嘉賓面前瞓着咗,幕後同事會好快安排我上車休息,再幫我解圍,好錫我。」稍後,泳淘會與好姊妹利穎怡和尹詩沛一齊開網店賣首飾,並有機會拍由歐錦棠監製的ViuTV新劇《打天下》,雖然是執二攤,但她完全不介意,希望將來可以作多方面發展。


採訪:嵐山
攝影:Matt
攝錄:Ricky Ip


-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載