› 選擇地區
三藩市
紐約
洛杉磯
其他美國地區
香港 台灣 北美
 
2019年10月21日

【放手擁抱自由】陳潔玲厭倦TVB抹煞個性 陪後生仔堅持抗爭

建立時間 (HKT): 1021 00:30

有「翻版陳妍希」之稱的陳潔玲(Christy)踏入32歲,仍以魔鬼身材加天使面孔現稱,備受宅男歡迎。2017年她毅然離開無綫,開設party room做老闆娘,聘請了不少年輕人幫手,她坦言受年輕一族感動,自己亦十分支持逆權運動,更眼濕濕寄語年輕人:「一定要堅持,其實有好多好多人出緊力。」

陳潔玲當年於港姐落選後簽約無綫,但卻被投閒置散,後來因演出《愛.回家》及與林泳淘到越南做《3日2夜》,被網民發掘,宅男一邊稱頂不順,一邊狂post她的性感相。對於前公司,Christy直言:「我對TVB冇怨恨,但我性格喺呢間公司5年已經係極限,我好有自己一套,唔可以俾人管住,做演員唔係要有個性嘅咩?點解要抹走晒我啲嘢?點解你要我喺你眼中好聽話就得?做演員唔係咁。」

Christy續道:「今時今日俾TVB解約係一件幸運事,因為做TVB真心俾人笑㗎。」她的好友林泳淘日前就疑因表態不獲續約,但Christy指失去人才是無綫損失:「你會發光去到邊度都會發光,冇晒自由意志,乜嘢都唔講得,好似俾人困住。」她指表達感受是基本權利,又慨嘆:「我以前當喺少林寺,喺入邊得到好多,佢當時係好輝煌電視王國,但係而家淪落得好快,係咁俾人批評狙擊,我覺得好快有一日大家睇都費事睇,突然會無視佢,好欷歔。」

現今Christy靠經營兩間party room成主要收入,她指與前公司約滿前半年已開始這門生意,純粹為好玩為開心,但她說:「做生意賺到錢一啲都唔簡單,困難成日都有,營運上經常有突發問題。」由於員工全部是年輕人,她說:「突然之間多咗好多仔仔女女,全部都係十幾歲。」因此她會用心指導他們,但年輕人返工態度較隨意:「中秋節兩間舖員工都唔知醒,有一個住好近撲出去開門,但已經遲咗,要同客人道歉計返折扣,有一個住好遠屯門,我惟有唔刷牙即刻衝嚟開門。」她坦言客人認得自己是藝人,令她有點尷尬。

由於近4個月來遇上抗爭集會,Christy指很多時沒有人返工:「會有員工到下午返工時間,話我仲喺機場。」不過她指現時已改進:「派咗更表,佢哋會安排自己時間,上街就唔好返工,全部都好乖。」Christy早在社交媒體發聲支持逆權運動:「我同小朋友相處,成日同佢哋傾偈,了解佢哋點解覺得絕望覺得憤怒,我好理解同支持佢哋。當一個社會權力同資源缺乏流動性,你就唔可以畀人絕望,或者好多人都覺得我生活水平唔錯,但我自己都覺得絕望,因為冇自由。」

逆權運動至今,不平事持續發生,可會覺得憤怒?Christy說:「作為一個真正香港人,如果呢刻都對政府冇憤怒係冇可能。」那一樣令她最憤怒?Christy坦言有好多好多:「多到已經……唉!突然間覺得我哋心臟可以咁強大,可以承受到咁多呢啲嘢。」不過她補充:「我成日同佢哋講,見到事情好憤怒繼而衝動,會影響咗好多決定,呢一場運動呢場抗爭,唔係一時三刻就完到,可能會好耐好耐,一定要沉住氣,留有用之身,做啱嘅嘢。」

問到現今局勢如何解決?Christy說:「真係好睇個政府,好睇當權者。」說完後她頓一頓補充:「我深信如果佢哋漠視所有嘢,係咁極權係咁壓迫,最終有一日係會拜拜。」她更眼濕濕寄語年輕人:「堅持,一定要堅持,其實呢一場運動係有好多好多人出緊力,我深信將來一日你哋會係主流。」

撰文:翁可人
攝影:葉君海
場地提供:Bilibala Private Room

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載