› 選擇地區
三藩市
紐約
洛杉磯
其他美國地區
香港 台灣 北美
 
2019年11月09日

【二創抗爭】梁栢堅。願意今生約定。煲底再擁抱

建立時間 (HKT): 1109 06:00

「願意今生約定煲底再擁抱」——梁栢堅
一對抗爭情侶,戴着黑色口罩,兩人在亂世下相擁,深情對望,眼神訴盡千言萬語!填詞人兼二創高手梁栢堅,為記下感人畫面,借用張國榮《今生今世》,改了這句觸動人心的歌詞。

相關新聞:【蘋聞重溫】梁栢堅改詞諷刺時弊「起朵」 入行前在銀行做主管

43歲的梁栢堅自嘲廢中,逆權運動發生後,幾乎每日都在社交網出post寸政府嘲克警,這天,大家約定在「黃店」做專訪,食肆尚未開門營業,熟客梁栢堅如身處屋企,自己開酒斟酒,飲完威士忌再飲「雨傘」紅酒,一個訪問連乾三大杯!

「好多人話我係連登仔,我唔係囉,我會睇嘅,我其實好懶post嘢,連登太快,我不如用真account post IG,我又冇讀書又冇做嘢,一起身就上網,上到臨瞓覺,上晒網癮。」8、9歲開始玩改詞,浸會大學畢業後卻入銀行工作,做了十幾年白領,30歲才轉行填詞,最愛這份工夜晚蒲完,第二天不用早起返工,以前玩世不恭的他,現身處亂世惟有藉二創抗爭歌,幫大家苦中作樂。

「我說過接你放學/讓我擔當揸車的主角/灣仔去大圍/然後落北角/我說過接你放學/換你安心/家長的感覺/乘坐我/乘坐我/求乘坐我 」——改自吳國敬《我說過要你快樂》
梁栢堅二創接放學歌熱爆網絡,他卻沒接過「仔女」放學:「車牌都冇,成日喺度飲酒,點接。因為我啲朋友接放學,同佢飲開傾開,好多感人故仔,幾有愛,變咗一隻接放學嘅歌,仲好笑有次同藍奕邦飲嘢,佢講咗句『我說過接你放學』,好過癮,佢話好多年啦,因為而家接放學有另一個含意,我話正喎,我偷你呢句用,第二日用10分鐘搭程車寫好。」

《DQ博士》嘲何君堯
人玩DQ稱得上十分之高招/某國力量和校長會嚇你一跳 #天空朗日也偷笑 #傻仔嚟喇」
「也許郁X馬蹄露/相機俾人掃/出錯大腳/腰骨冇力才摔倒/踏上差館馬蹄露/然後搭件外國佬/你的一頸血液/恥笑到流淚/終於見報 」——改自謝霆鋒《非走不可》

最想改詞唱衰邊個?梁栢堅說:「嘩,太多人太多團體,嗰班人唔唱已經衰,我已經玩到悶,譬如林鄭、葉劉嗰啲,有啲人根本上連寫佢都唔想。有啲好笑,佢越戇居越要唱,其實唔係去整衰佢,係笑佢,X,你點解可以咁低能!何君堯都得意,有人畀條橋我《DQ博士》,用兒歌嚟玩佢,馬蹄露私了都好笑。」

網民讚:「有聲嘅,跟住唱tim」、「可唔可以出一本抗爭歌集,肯定好L賣過啲口罩。」努力玩盡抗爭歌,梁栢堅想達到甚麼效果?他說:「冇吖,我本身個人低能,低能嘅人係冇目的,開心當賺咗,大家咁唔開心,如果大家有反應,令你舒服啲,已經係免費娛樂。」今年那首歌最好?「唔使講,已經選咗出嚟,《肥媽有話兒》係贏晒,我見到小學生去旅行,佢哋自己喺度唱,勁呀,小朋友會揀自己想玩嘅(嘢)玩,起碼令佢哋覺得繼續讀書或做嘢,個人先上進,如果唔係行錯路好大鑊。」

身邊多唔多朋友出去抗爭?他飲着雨傘紅酒,笑說:「拉晒啦!咁講啫,抗爭唔一定用行動,可能文宣,要全部配合,一個短訊一張海報一份改詞一張改圖,可能令某啲嘢發生呢。最感動 有次飲醉,『願意今生約定煲底再擁抱』嗰句,覺得幾正,之後有人用咗貼落葵芳連儂牆嗰度,可以煲底再擁抱同飲酒係好嘢,呢支酒有啲留咗,有一日會飲,過嚟飲,大家加油。」

抗爭運動改變了很多人,梁栢堅說:「有時瞓唔着飲多少少,頂唔順你可以點,唯一可以令自己快啲瞓着咪飲吓嘢。有冇飲醉到衝上差佬度?又唔會嘅,控制到嘅,自己乖乖地瞓喺度,等first aid嚟,哈哈,冇人會救你,全部要自救,香港人記住啦!」如何為這場運動盡一分力?他說:「我呢啲廢中,成日喺度指指點點,嘆少啲冷氣,出少句聲就最好。」娛樂圈已經好少人出聲,他說:「咁加入埋出少啲聲,我都覺得自己太嘈,講真鼓勵吓年輕人,因為做人難,做香港人更難,做香港嘅年輕人係最難,呢樣嘢係多謝香港年輕人。」

黃到出汁的梁栢堅,仍有人夠膽搵他填詞嗎?他說:「搵我填海就有,X你老味,填乜詞,冇⋯⋯唔係,都有,兩樣嘢,冇乜受影響,我本身冇工作,係零,本身少產量,呢排係全世界都少咗嘢做,電影同音樂都係,我有第二度嘢做,改詞囉,改詞冇收入,但係一個練習,幫個腦run緊。」

驚唔驚被人拉,現言論自由都幾乎變成稀有東西,他說:「言論自由?以言入罪,甚至你冇講任何嘢,企喺度樣衰都得罪佢,咁你拉我囉。」笑言現在除了山頂區,每區都有機會被克警圍,家住港島區的他有否落樓鬧克警,他諷刺說:「我唔鬧架,我讚好警察,但未搵到。有次見到佢攞住支槍,但嗰度冇人,醉醉地咁啱經過,對住槍管影shot,跟住諗番我都幾黐線,如果佢手指扣歪,我兜頭爆咗,飲醉酒行街係好得意。」

訪問期間,梁栢堅分心回覆「梁柏堅(表弟)」短訊,原來香港有5個較出名的 「梁栢/柏堅」,分別是電影導演梁栢堅、現參選灣仔「大佛口」議員「表弟」梁柏堅、「突破」出版總監梁柏堅,還有一個是的士佬,填詞人梁栢堅笑說:「五堅戰隊,我覺得佢哋作用就係,如果佢哋返到大陸,我都冇事,因為一搵到個名就搞你先,唔會fact check。知唔知自己係咪大陸封殺名單?冇理喎,X,回鄉卡都過期冇續,暫時冇乜興趣,既然好多人返唔到去,陪佢哋一齊唔返。」幾耐冇返大陸?他說:「好似係雨傘前,都好耐,呀,唔係,你咁樣講嘢嘅?香港都係大陸㗎,你咁樣跣我,我而家日日都喺大陸,又監控又盛,佢哋覺得香港係大陸啦。」

撰文:余燕儀
攝影:仇志德
攝錄:廖達燊
場地:心燒食堂

-----------------------------
2019區選專頁
光復香港 11.24踢走共產黨

-----------------------------
【撐學生】
召集有心人 撐學生全年睇《蘋果》
立即按此

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載