【做咩咁驚青】阿Sa出賣好姊妹玩大踢爆 容祖兒恐嚇:拎對鞋塞住你個嘴

更新時間 (HKT): 2019.08.14 13:51

容祖兒紅館演唱會昨晚去到第9場,好友Twins及關智斌(Kenny)擔任嘉賓,祖兒介紹嘉賓出場時說:「我哋一齊長大,經歷嘅唔係你哋能夠想像,我曾經喺佢哋演唱會飲大咗,上次演唱會真係好好玩,真係要好信得過,好有親切感,好有歸屬感,我先夠膽死喺台上面飲大咗,今日唔知佢哋點對我,希望佢哋錫住我啦!」然後唱出《風箏與風》一曲,並邀請Twins上台。

Twins獻唱《大紅大紫》後,蔡卓妍(阿Sa)即大爆:「我哋今日其實帶咗啲大禮畀你,雖然容祖兒冇乜緋聞,你唔好以為佢冇人追,真係好多人追佢㗎!今日已經有幾個喺度。」鍾欣潼(阿嬌)接住問:「你係咪想講日本嗰個?」阿Sa扮猶疑問: 「係咪真係講得㗎?」祖兒馬上搶白 :「唔係,掩住你哋個嘴,佢哋(觀眾)冇人想聽我緋聞。你試吓再講,我拎對鞋塞住你個嘴。」

阿Sa卻繼續狙擊:「做咩啫!我想話好多人鍾意你,但你未同人開始,就終止人哋關係......」祖兒急住解釋:「我要專注事業,如果拍拖點做咁精彩演唱會,影響晒囉!」阿Sa問觀眾:「大家都好想祖兒可以搵到個好歸宿,係咪先?」祖兒低頭扮怕醜: 「我真係龜縮。」Twins最後都沒有爆出追求者身份,繼而再邀請Kenny上台大合唱《死性不改》。唱完歌,祖兒就問Kenny為何超興奮?Twins即搶住幫手宣佈Kenny紅館騷加開1場。

娛聞樂陪你走遍全球追星,即Like「娛果」FB 專頁!
BannerBanner