【藝人踏台板】三位台前幕後談劇場新氣象 電影電視以外有出路

更新時間 (HKT): 2019.08.22 00:30

最近舞台劇界十分熱鬧,不單止劇種多元化,更有不少娛樂圈中人的參與,好像有劉松仁擔任監製的《利瑪竇》,以及影后、視后級人馬如葉德嫻、惠英紅、張可頤和宣萱等首次踏台板演舞台劇。對近來的舞台劇新氣象,《蘋果》找來三位劇場台前幕後,包括香港話劇團助理藝術總監馮蔚衡、歌手王菀之及劇場監製張珮華,談談戲說說劇。

自今年初,舞台劇界比過往較熱鬧,事關娛樂圈中人的參與比往年特別多,如惠英紅主演《玻璃動物園》、劉松仁監製的《利瑪竇》、葉德嫻主演《親親麗南》、宣萱主演《大辭職日》,以及馬浚偉身兼編導演的《生前約死後》等。

有指近來內地對電影及電視過度審查,部份作品未能順利上映,令一些娛樂公司另闢出路,如投資舞台劇。對於最近舞台劇較興旺,資深劇人馮蔚衡表示︰「都係,興旺吓咪好。香港係個多元社會,可以有好多唔同形式嘅作品出現,有興趣可以接觸吓。我哋係政府藝團(香港話劇團),同商業運作嘅模式唔一樣,多啲選擇,世界咪靚啲。」

對於劇場興旺,劇場監製張珮華認為︰「其實十幾年前已開始,只係今年較白熱化。香港係體驗型經濟,當手機可以睇到娛樂時,仍然會有空間,始終有觀眾仍渴求有現場感、即時反應嘅演出。」為何近年較蓬勃?她說︰「我嘅分析係而家電影電視,喺題材同尺度上,時不時都有一定嘅調整。」

首次繙譯劇本,又擔任監製和主演的王菀之,對近年劇場較興旺,她認為︰「我唔敢咁講,但除咗音樂會、電影以外,交流文化仲有劇場,而自己都係推廣嘅一份子。」她認為劇場排練,有好多訓練,令舞台劇技巧發揮得更好,相反平時拍劇拍電影則沒有時間去訓練。

談到舞台劇是否回本較快?馮蔚衡則認為︰「我唔敢講,大家嘅運作唔一樣。我哋係蝕住咁做,好似《如夢之夢》因為有政府支持,票價先可以做到咁低,如果喺北京、上海票價起碼一倍以上。」王菀之則表示︰「我完全答唔到,因為間間公司都唔同。舞台劇由籌備到完成,唔一定比電影電視快,好似我搞《First Date》搞得好急,得9個月時間,而家我都傾緊兩年後下一個舞台劇。」

對於舞台劇回本快的看法,張珮華表示︰「舞台劇嘅優勢,因為有演期,又知道幾時演出,幾時開票房,呢啲對投資者嚟講,睇到幾時可以回到本,較有規劃。」她認為另一個優勢就是同一個劇本,可於短時間內,由不同演員再演出,如之前《狂揪夫妻》蘇玉華曾接替吳君如再演,故令投資方較喜歡投入資金。

至於舞台劇的觀眾層面是否不斷改變?馮蔚衡認同說︰「有,而家多咗商業演出,吸引到平時唔入場嘅觀眾。可能電影電視嘅模式轉變緊,觀眾試下選擇舞台呢個media。」而王菀之則認為,以前沒有慣性入場的觀眾,但現在會有一些觀眾,會帶朋友入場。至於張珮華則有另一番見解,她說︰「好似《杜老誌》,以前確係有呢個地方,有年青觀眾買飛帶上一代入場睇;有改編十幾年前嘅廣播劇,亦有年青觀眾入場懷舊吓。」

娛聞樂陪你走遍全球追星,即Like「娛果」FB 專頁!
BannerBanner