【11.1結婚】43歲陳山聰法國婚照首曝光:畀女友有個美好回憶

更新時間 (HKT): 2019.10.10 12:34

43歲陳山聰憑大台劇《金宵大廈》演保安員阿蕭,人氣再度急升,首次擔正男主角即大受歡迎,有望今年爭視帝,事業順利、愛情甜蜜,他將於11月1日迎娶拍拖5年的圈外女友Apple,於香港一間酒店筵開10席,邀請圈中好友,近日陸續派喜帖給親友,據知山聰很喜歡小朋友,已計劃婚後生B。

婚禮在即,陳山聰與Apple的婚照亦率先曝光,早前山聰與Apple特別飛去法國拍攝婚紗相,在發放的照片中,兩人流露出無限的幸福和快樂,山聰望住Apple的眼神,簡直甜到漏,近年努力練跑的山聰,身穿白色背心大晒麒麟臂,山聰表示:「其實我同太太拍拖呢5年入面,我都冇為太太做過啲咩浪漫嘅事,而家終於要結婚喇,所以我好想帶佢去一個好浪漫嘅地方影相補數,希望畀到佢有個美好回憶。法國係一個我相信大部分女仔都會鍾意嘅地方,加上太太以往未去過法國,所以好想同佢喺呢度,影一輯靚靚婚紗相,成為我同佢之間一個最美好同難忘嘅回憶。」

山聰笑言今次拍攝婚紗相絕對是多得好多兄弟姊妹的幫忙,令他能夠用最有限的預算,做到最佳、最滿意的效果,問到世紀婚禮的預算?山聰說:「呢個美好回憶係唔可以用錢去衡量,婚紗相出嚟嘅效果好滿意,只要係能力範圍內做到,一定要令太太開心,希望大家睇到都鍾意。」他表示11月1日的婚禮以簡單形式進行,最重要是家人同最好的朋友在場,與他們分享喜悅,就是最美好的一晚。

不過婚照可見,未婚妻Apple不時側身企,靠近山聰,疑似刻意遮肚,另一張黑白婚照,Apple又用手摸一下肚仔。未知山聰是否雙喜臨門,等待時機再公佈好消息呢!?

娛聞樂陪你走遍全球追星,即Like「娛果」FB 專頁!
BannerBanner