【永遠懷念】薛家燕憶黎小田泣不成聲 臨終囑咐要保重身體

更新時間 (HKT): 2019.12.06 20:00

黎小田於周日(1日)早上離世,享年73歲。為紀念一代音樂巨匠殞落,無綫今晚在電視城錄影特備節目《創造經典永遠懷念音樂巨匠黎小田》,黎小田的生前好友薛家燕、余安安、柳影虹及李龍基等亦有出席。以全黑打扮現身的薛家燕,更即場在紀念冊中寫着「Dear Michael,你是我的心肝寶貝,Love Nancy家燕。」

提到已故摯友,家燕亦難掩哀傷,訪問期間一度泣不成聲:「我識咗佢幾十年,真係好唔捨得,其實Michael走咗之後,我就難過咗咁多日,一下子接受唔到,而且喺網絡上見到以前我哋合作嘅片段,佢又喺唔同訪問之中講對我嘅睇法,令到我更加難過。」她還說:「小田係一個好矜貴的人,好多工作佢都唔願做,我邀請佢幫我做《流行經典五十年》,佢本來係唔願意,我話『你唔係答應要照顧我一世?而家我需要你幫忙,你又唔嚟』,之後佢就答應咗,直到年幾之後,佢就同我講有啲攰,唔想再做,或者嗰陣時佢身體就唔舒服,我都冇察覺到,佢係一個好叻同成功嘅音樂家,貢獻好大,係一個好好拍檔!」

家燕姐又指4月時,黎小田曾跟自己透露心口覺得不舒服:「佢成日拖住我隻手話凍,我仲同佢講我着低胸都唔凍啦!問佢係咪其實想拖我隻手,佢又冇出聲。」她指現在回想起來就覺得難過,而由於要尊重其家人,故不能透露黎小田病況,只能說他離開時很安詳,兒子與朋友都在旁。家燕姐又指黎小田最後囑咐她要保重身體:「佢叫我唔好食太多嘢,但又話我肥咗好睇。」家燕姐又指黎小田的家人已安排好身後事,又感謝各界關心。

柳影虹見到薛家燕喊,她亦忍不住流淚,問到有否探望黎小田?她:「冇呀,佢都唔想咁多人探佢,我尊重佢嘅意願,小田哥應該無憾,佢喺樂壇有好大成就、有好多學生、好多人仰慕佢。」 另外,蔡一傑與陳敏之亦有分享了與黎小田相處時的趣事,傑仔坦言自己收到黎小田離開的消息,正值草蜢在美國的演唱會開場前,令到他表演時都有些恍惚,亦很遺憾不能見對方最後一面,而敏之則表示人生無常,故要好好珍惜身邊人。

娛聞樂陪你走遍全球追星,即Like「娛果」FB 專頁!
BannerBanner