【獨家專訪】張文采卸下主播身份 談無綫新聞偏頗:接受唔到,咪走囉!

更新時間 (HKT): 2019.12.10 06:00

「呢節新聞報道完喇,多謝大家10年嚟嘅支持,後會有期,再見。」

似曾相識的讀白,來自剛卸下TVB新聞主播身份兩星期的張文采(Wendy),亦是她在上月25日最後一節晚間新聞及天氣報告後,坐在主播台前講的最後一句說話。

回復自由身的Wendy,日前現身觀塘接受《蘋果》訪問,眼前的她像脫胎換骨變了另一個人,除了一臉輕鬆的笑容,髮型、化妝及衣着打扮都跟電視機內的「張文采」很不同,最吸睛是那金、黑、橙三個不同顏色的指甲油;唯一沒有改變,就只剩那聽足10年的「主播腔」。Wendy笑謂:「有同事問我離職後第一件事係咪去生仔,我就話係去染頭髮,因為一直好恨染一個灰色頭,所以即刻去染。」

重提當晚最後一次報新聞,Wendy說:「之前同事問我有冇緊張我都話冇,但原來坐低咗真係有啲緊張,我本來冇諗住要講啲乜,但同事就話最後一次,一定要講啲嘢,於是我就叫編輯畀5秒時間我,緊張程度比第一日返工仲大,手心冒汗,好唔想讀錯同食螺絲,真係手都震,想喊咁滯,讀完之後望出去見到好多同事伏晒喺玻璃望住我,大家拍晒手掌,出到去就忍唔住喊喇!」

事實上,TVB新聞部幾乎每隔一段時間便有離職潮,過去半年社會運動熾熱,甚至有傳一周內有8個記者、主播辭職,當中包括曾經把FB頭像轉為黑色,以及穿全黑衫報新聞,疑低調表態的Wendy;亦因為這些舉動,網民即時開post熱議,同時獲不少網民讚賞有良知。一直未有公開表態的Wendy,承認不少認識的人,知道她請辭後都曾經問她同樣一個問題,就是「點睇TVB被指報道偏頗?」而她的答案都是一樣:「做得份工就要專業,接受唔到,咪走囉!」婉轉得來,卻又很直接。

不過,Wendy強調離職並非單一原因,又指去年已經許下承諾,做滿10年便離開,因為覺得10年是一個里程碑,更笑言:「公司為咗慰勞年資長嘅同事,離職時有餐飯同有個金牌,我一直朝住呢個目標進發,終於都食咗餐飯喇!」

然而,工作量越來越多都是Wendy請辭的重要因素。她說:「工作量好多,好長工時,同以前個年代好唔同,自己年紀又越嚟越大,唔係好應付到,有時返凌晨4點,有時收凌晨12點,好多重要直播要做,準備工夫要做好多,咁結咗婚都想穩定啲,加上老公嘅工作,每星期會有一兩日唔喺屋企,之前真係試過一星期只見到兩次。」

香港的社會氣氛於過去半年一天比一天差,Wendy坦言對心情都有影響,「有時睇得多,每日讀咁多,係睇到個心好唔舒服,有個感覺想逃避離開,唔想咁前線接觸呢樣嘢,當然個心都會諗住,加上而家一打開電話都會睇到好多......係要繼續關心嘅,但要搵方法去抒發。」她又補充:「我覺得作為一位專業主播,無論乜嘢情況,就算屋企或者身邊有乜嘢事,觀眾開住電視就係望住你,就要表現專業一面,呢個先係最重要,私人感情一定要擺埋一面,可能你啱啱同男朋友鬧完交,或者啱啱喊完,你坐上去都要表現專業,先係尊重番自己工作,因為唔係只代表自己,係代表公司,而且可能一個失誤會影響到其他同事,有乜嘢就off camera先處理。」

娛聞樂陪你走遍全球追星,即Like「娛果」FB 專頁!
BannerBanner