【最新】黃心穎潛水8個月回港 「安心偷食」後眼濕濕:終於返到屋企

更新時間 (HKT): 2019.12.14 07:43

現年30歲的黃心穎今年4月被《蘋果》獨家爆與人夫許志安在車廂偷食,報道一出,震驚全城,二人先後公開道歉,宣佈全面停工,疑復出無期,心穎於IG貼道歉文稱「無法面對自己」感到十分羞愧、歉疚,事後被《蘋果》影到避走美國,盛傳心穎想轉行,不過自台慶劇《牛下女高音》播出後,心穎悄悄在IG「蒲頭」試水溫,昨晚更突然傳出心穎將返港。

消失8個月的心穎,今晨6點53分抵港,大批記者聞風而至,早在機場守候,而黃心美經理人、TVB兩個經理人亦前來接機。

約早上7點幾,心穎從機場禁區步出,現場守候的傳媒洶湧而上,場面一度出現混亂,身穿灰色大褸、戴口罩的心穎,甫見記者已經眼濕濕,一直強忍淚水,她說:「我好開心,我終於返到屋企!喺過去差唔多8個月,好努力咁生活,聽到外界有好多嘅猜測,但我只不過好努力咁生活緊,同時我都想繼續向前行、向前望,I made a mistake, And I try really hard to live with it, to learn from it. 無論我想講、我要講,私底下我都講咗,喺呢件事上面唔會再有任何回應,而今次返嚟,我最主要係陪我屋企人。呢段時間多謝大家關心,(工作上有咩安排?)今次返嚟係要陪家人,其他冇咩回應!」現場有半百傳媒追訪,沿途由家姐黃心美的經理人護送去停車場上車。

心穎與安仔因「安心偷食」曝光,兩人賠上事業,形象插水,最近他們登上「Google香港2019年度熱爆本地娛樂名人」榜頭兩位,而兩人另一半鄭秀文(Sammi)、馬國明位列第4、第5位。雖然安仔至今仍然停工,但事件得到太太Sammi原諒,二人破鏡重圓,反而心穎與馬明戀情告終,降呢做朋友!

心穎今次復出可謂有跡可尋,早前《牛下女高音》進入結局篇,她兩度在IG蒲頭感謝劇組,受事件影響,本來大台抽起她有份主演的劇集《堅離地愛堅離地》和《丫鬟大聯盟》,近日兩套劇卻先後獲得「解禁」,《堅》已經在大馬播出,《丫鬟》則被安排月底在翡翠台播出,大台劇照播,雖然心穎未有機會被提名角逐今年台慶頒獎禮的獎項,不過今次返港,無綫亦安排經理人接機,估計她有望「解凍」!

娛聞樂陪你走遍全球追星,即Like「娛果」FB 專頁!
BannerBanner