【楊明又貼撐警相】莊思明為細size鮑魚扯火 寸嘴窒食客惹人不滿

更新時間 (HKT): 2019.12.14 17:00

唔怕神一般的對手,只怕豬一樣的隊友!

繼「荷蘭叻」陳百祥兩度到警總撐警,昨日曹永廉一家、楊明、莊思明、莊思華、姚瑩瑩、前保安局局長李少光兒子李霖恩、李嘉、冼國林與及朱庭萱(玻璃朱)一行多人組團到警總送暖,原本想低調,可惜人算不如天算,大合照被疑似警察放上網,玻璃朱即爆粗留言,又「提醒」上載者:「班藝員係秘密探訪,唔出鏡㗎害死人喇!」

通咗天收唔番,玻璃朱轉頭突然在自己facebook貼出這批撐警照片,搞到網民個個黑人問號:「你唔係叫人del post咩,做乜自己又post呀?」而這個疑似警察facebook賬戶事後突然消失。而撐警團成員之一的楊明有樣學樣貼出撐警之行的相片,不過就投其所好,只放上微博而沒有放上IG。他今早貼送暖圖並留言:「香港警察從來都沒有放棄我們,我們亦絕對不會放棄您們,#香港警察# 謝謝您們一直堅持維護法紀,保衛香港!#正能量#香港警察 #不離不棄​」

楊明女友莊思明亦自身難保,她早已與網民有罵戰前科,今日她在楊明有份做老闆的食肆facebook專頁再次與網民鬧交,事緣有網民光顧後留言:「本來諗住物有所值就試下啦,點知隻鮑魚細到我都唔知講乜好,加上料唔太足變咗價錢相對太貴,感覺瀨咗嘢!」莊思明隨即回覆:「謝謝反映,我得閒幫你去海味舖compare下價錢呀,睇睇$88咁多餸係咪太貴!會改良的,謝謝你的意見!」結果當然引起網民不滿,有人說:「阿老闆娘去完撐警係寸啲,雖然藍店不了,但真係好想親身睇下88蚊有幾多餸,仲可以咁串!」、「好心唔好咁賤啦!拉成班二打六去慰勞啲黑警,但在店門口貼紙扮黃!cheap到冇人有!」

娛聞樂陪你走遍全球追星,即Like「娛果」FB 專頁!
BannerBanner