【《造星II》決賽】Hugo表演自創歌《山下見》 極黃歌詞打動網民

更新時間 (HKT): 2019.12.15 23:01

《全民造星II》今晚在邵氏影城舉行決賽,觀眾原本關心三甲誰屬,不過進入比賽第三階段,丘凱雄(Hugo)的表演一出,即扭轉討論氣氛。

原本第三階段是個人表演環節,不過Hugo的表演有Angus、Heartgrey、繼文、Jerry四位落選參賽者幫手rap,其後又有合唱團演出。但最多網民討論的不是表演人數,因為Hugo表演的自選歌曲極黃,歌名叫《山下見》,當中歌詞令人有不少聯想,例如「茫茫圍城的顛簸,層層燎原的星火 重燃原來消失的感覺」、「一個族群被化淡 一隻又一隻被打破嘅雞蛋」、「一次又一次人性嘅災難」、「四面八方素未謀面嘅手足 攀上一座山峯」、「時代力量會不會成功 團結一心不要忘記初衷」、「有邊個唔想做小小廢青 被迫挺身不惜與綠魔交織 步步進逼 過激 全民反擊」。Hugo唱完《山下見》,在反送中抗爭者梁凌杰去世半年的今夜,就說出一句rest in peace.

有網民睇罷Hugo演出,即表示要轉投Hugo,務求令Hugo打入三甲。更有精明網民表示,Hugo的演出沒有字幕,反而其他參賽者,無論唱廣東歌、英文或普通話歌都有出過字幕,質疑ViuTV打壓Hugo。不過亦有網民聽完《山下見》後,紛紛到ViuTV的FB專頁中,大讚該曲「好正」,以及多謝Hugo。

Hugo演出後有感而發:「呢個係十強能夠企喺舞台唔係完全十強嘅功勞,係得到好多人守護,我哋邊個係冠軍都要有大家先至成事。」Jerry其後在IG表示:「希望你哋聽到歌詞」。

Hugo賽後受訪時說,歌詞由隊友負責,自己作曲,講到《山下見》的意思,他說:「都係奉獻畀呢個比賽參賽者,支持我哋嘅人,同埋支持其他嘢嘅人。」問到所指的支持是甚麼時,他解釋:「支持呢個社會,支持呢個世界…」話到一半,他轉講創作新歌的初衷:「我當初創作呢首歌,係因為每次比賽完都覺得好攰, 我希望每個人返到屋企都可以有首歌,聽完係可以懷住希望再行之後嘅路,所以作呢首歌。希望聽眾聽完之後可以懷住意念,去做佢哋覺得應該做嘅事。」

觀眾覺得《山下見》深黃,Hugo謂:「有啲咩其他意思就留返觀眾自己去解讀。佢(指首歌)其實有幾層意思 ,無論喺比賽上,定還是喺其他角度都有, 如果大家聽到其他角度…… 藝術本身係一樣 你覺得係咩就係咩嘅一樣嘢如果你覺得首歌係代表到你,或者係心靈上嘅慰藉,咁就係一樣好開心嘅事。如果你覺得首歌喺呢場運動裏面畀到你少少慰藉,或者係小小嘅寄託,咁我覺得係一個幾好嘅願望, 令到大家可以繼續咁行落去。」不過Hugo覺得新歌仍有沙石,會再製作新版本。

至於比賽結果,吳啟洋(Phoebus)贏冠軍,大熱MC只得第二,季軍是李祉均(Oscar)。

娛聞樂陪你走遍全球追星,即Like「娛果」FB 專頁!
BannerBanner