【為缺席致歉】黃秋生指有警員行徑異常需徹查 勉港人要如常生活

更新時間 (HKT): 2020.01.14 21:13

影帝黃秋生原定今日出席港台《視點31》節目,與何君堯就「論良知.談正義」進行討論,但秋生臨陣向港台表示未能出席,因為秋生外父過身及自己切傷手指要入院縫針,故未能赴會。最後節目由主持利君雅及何君堯繼續進行。

而港台則派記者彭德章到醫院找秋生,並進行直播,見一身便服的秋生,戴上口罩受訪,見其左手拇指包紮着,他眼泛淚光地表示:「今日真係踢晒腳喇,呢啲真係天意嚟嘅,差唔多時間……你話早啲發生呢,都仲可以做晒所有嘢,啱啱趕得切,佢啱啱就係呢個5點幾、6點嗰段時間。首先就係我外父哮喘、氣喘,就要入醫院,call救傷車,跟住我諗住煮啲嘢食,點知隻手剷落把刀度,差唔多切咗半隻手指咁滯,縫咗5針喇。咁我流血就去咗第二間醫院,啱啱個護士同我洗完傷口之後,就收到個工人話(外父情況)危急喇,咁我就要未縫針即刻嚟呢間醫院喇。嚟到,佢就已經離開咗,醫生見到我隻手指咁樣樣,就叫我不如登記埋縫針,所以縫埋針、登記埋、認埋屍,我而家就要等個舅仔趕緊過嚟,咁所以就冇可能去得到。」

秋生不忘向期待今晚「黃何大戰」的觀眾及特地到現場的人士致歉,他說:「令到大家失望就唔好意思喇,尤其係門口嗰幾百人嚟歡迎我,咁我嚟唔到,大家都可以收隊,早啲返屋企瞓覺喇。」

講到今日討論的題目「正義和良知」,秋生表示:「正義同良知吖嘛,都係一個哲學問題嚟嘅,我諗都諗唔到會開一個咁大嘅題目,呢兩個題目其實都可以寫一篇論文嘅。」秋生問主持人節目有多長,當他知道節目只得15至45分鐘時間之後就表示:「半個鐘頭9個字(30至45分鐘),其實講一樣都講唔完!因為正義同良知係每一個人唔同,每一個地方唔同嘅東西嚟㗎,你唔可以話我嘅正義我嘅良知,就係你嘅正義你嘅良知,我相信阿何佢都有佢嘅正義同良知,即係有啲人呢,我所謂嘅飯就係佢嘅糞便,你所謂嘅糞便就係佢嘅飯,嗰一樣嘢係調返轉㗎,所以大家嘅理解同認知唔同嘅時候,好難用9個字去討論呢啲問題。」

講到執法及大眾關注的7.21問題,秋生說:「7.21基本上係大家一個好大嘅疑慮同埋恐慌㗎喇,呢樣嘢好明顯……就算你話警方冇參與都好啦,都會懷疑緊警方係唔係縱容呢一件事發生呢?咁當大家咁多人去懷疑嘅時候,其實政府係有必要去調查嘅,我唔夠膽敢講話所有嘅警察、全香港嘅警察都係壞人。嗱!我頭先入到去入面(醫院),警察非常之有禮貌、非常好,我唔鍾意戴口罩嘅,亦都唔戴口罩嘅,不過警察畀我我先戴,(警察)非常之好禮貌,唔係個個都係咁樣嘅,正因為唔係個個係咁樣,大家見到咁多警察嘅暴力同異常行徑,所以更加有咁嘅必要去進行調查,睇吓究竟有啲乜嘢人係超越咗佢應該嘅職責。」

被問到警員操守有落差,秋生即說:「呢個唔係人嘅問題,係制度嘅問題,所以好明顯見得到,唔係個個係咁嘅時候,就唔係人嘅問題,呢個係一個制度迫使、有某一啲人容許某一啲人去做某一啲嘢,越軌嘅行為。咁你明顯㗎嘛,有啲好具體嘅例子㗎喇,有啲畫面你係會見到㗎嘛,不停大聲喺人哋咁近嘅範圍問人哋『你係咪襲警呀?你係咪襲警呀?』即係基本上佢好似問緊人哋『我係咪一個人呀?我係咪一個人呀?』咁上下,係行為異常吖嘛,人哋係唔係襲警你唔知㗎咩?你仲要問人哋?有好多異常嘅行徑,係失常㗎嘛,咁你呢啲仲唔需要調查?佢冇咁嘅能力去執行職務㗎呢啲,咁呢啲會影響到其他正常嘅同袍㗎嘛!」

記者再問到秋生外界覺得好像無論在哪一個陣營,香港人都感到難捱,秋生說:「我成日都諗起二次大戰時嘅英國大轟炸,大家每日都準備去被德軍轟炸,但係英國人每一日都會如常咁過自己嘅生活,應該返工嘅就返工,應該湊仔返學上學嘅就上學,應該有咁樣嘅胸襟,同埋我哋展望嘅係將來,覺得有人嘅地方就有希望!我對香港嘅巿民好有信心,所以其實每一個人睇同一件事都有唔同嘅反差,咁所以黑同埋白中間仲有好多灰色嘅地方帶,呢個世界唔係淨係黑同白咁簡單,有好多時候有啲人好刻意咁樣睇唔到某一啲嘢,有啲人又以為自己睇到某一啲嘢,但其實佢又唔係睇得咁清晰,所以我覺得係應該做學問嘅做學問,應該創作嘅就繼續去創作,總言之大家喺個心入面知道我哋守護緊一個香港人一路以嚟嘅價值。」

娛聞樂陪你走遍全球追星,即Like「娛果」FB 專頁!
BannerBanner