【目標儲300萬】龐景峰計劃兩年後結婚 唔想揼錢去晒命

更新時間 (HKT): 2020.02.14 09:00

郭秀雲與前夫錢小豪所生的兒子龐景峰(Andrew)自認長情,與女友何佩珈(Peggy)拍拖2年多,相當恩愛!Peggy是慳妹一名,她最愛在家下廚,在這個情人節正值疫情蔓延時,來得很不一樣,二人選擇預早到山上呼吸新鮮空氣,之後由Peggy炮製三餸一湯,度過了溫馨浪漫的二人世界。

這天,Andrew帶同秋田犬「梳打」一同行山,他們視「梳打」為親生仔,二人用心全力照顧,正值武漢肺炎肆虐,大家人心惶惶,Andrew選擇到戶外走走,他說:「邏輯上少人嘅地方就安全,所以行山就安全,呢個時刻,大家做足防疫嘅工夫就OK,好彩屋企附近有公園,行5分鐘左右,可以帶埋隻狗去。」

現年29歲的Andrew對25歲的Peggy十分情深,更視對方為結婚對象,Andrew剛開了武術演藝學院,加上努力接戲,希望盡快儲到300萬老婆本,待Peggy兩年後畢業便計劃結婚,Andrew說:「我要慳㗎,仲要養我間學校,結婚?等佢畢業先,我有儲緊錢㗎,不過就算結婚都唔會喺5星級酒店,一來『娘』,二來我點解要咁樣揼錢去晒命!結婚係開心嘅,唔係要攞錢出嚟買幸福,我希望可以請到一班人去個舒服嘅地方,可能夏威夷,咁大家會有一個開心嘅回憶。」Andrew直言要先儲錢買屋,要養學校與未來老婆,確實不容易,問他距離300萬的目標還有多遠?他說:「拍幾套大片應該儲得返,Peggy畢咗業都要搵到一份工先,我唔鍾意有啲香港女仔以結婚為人生目標,唔通留喺屋企成世咩!」

預祝情人節,Peggy大顯身手,炮製多款拿手的小菜,Andrew卻被女友阻止步入廚房禁地,原來他是「地獄廚神」,曾試過煮麵時差點燒了廚房,這次Andrew一入廚房便搞搞震,拿着菜刀揮舞,氣得Peggy怒罵Andrew只準他旁觀。其實Peggy入得廚房,自從媽媽過世,她便負責煮飯給爸爸吃,Andrew當然也是受惠者,Peggy謂煮飯既健康又可以慳錢,Andrew說:「呢排都係屋企食多,佢煮嘢係好好味嘅,其實我哋一齊咗之後,真係多咗喺屋企食。」

未來是他們一同度過的第三個情人節,Peggy說:「每個節日都一樣,最重要係隔籬嗰個人係邊個,生活都係咁過,每日都一樣,有隔籬嗰個同屋企人陪你過已經好感恩,人大咗,能夠做到自己想做嘅已經好難得,可能放假瞓得晏啲,一齊飲杯咖啡已經好開心。Andrew會留意到我生活上嘅需要,已經好足夠。」Andrew強調不要用錢來衡量愛情,不需買名牌、到貴價餐廳,他寧願將金錢花在回憶當中,故他希望可跟Peggy去多點旅遊,留下他們一起的美好回憶。

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner