【攞個膽結婚】林子博當年擺酒正值失業加沙士 侍應戴口罩捧住乳豬全體

更新時間 (HKT): 2020.02.14 06:00

前大台娛樂新聞主播林子博同太太Shirley在2003年結婚,婚後先後誕下女兒詠渝和兒子卓楠。去年他們經歷了一次人生的重大考驗,在4月的時候,Shirley被確診患上極罕見癌症「平滑肌肉瘤(腹腔)」,同年10月子博又接獲無綫不續約的通知,可謂屋漏偏逢連夜雨。

日前林子博與太太Shirley接受《蘋果》訪問,原來他們當年結婚,情況與目前亦很相似,子博說:「嗰陣正值係沙士,真係唔到你唔信,好邪,註冊嗰日係3月28日,係啱啱開始,到咗5月6日擺酒嗰日係高峯期,我仲記得開席啲侍應好似醫護人員,個個都戴口罩捧住乳豬全體出,成間酒店都冇人,而且嗰一年我都係冇嘢做,又係失業,嗰陣我又係離開咗做咗9年嘅ATV,情況同而家好相似。」他續說:「其實冇正職結婚都要攞個膽出嚟,不過我唔想走甩件好嘢,工冇咗可以搵得番,但係老婆冇咗搵唔番。」笑稱Shirley似乎比子博還要大膽?她笑説:「嗰陣都好兩極,我屋企人就鍾意佢,我哥哥同媽咪叫我快啲嫁,唔會介意佢嘅背景,反而朋友就叫我諗清楚,覺得佢好花弗。不過我一向都好聽阿媽話,佢話幾好,個相都冇乜問題,以前試過男仔見佢話唔好,可能嗰一刻我追求安穩生活,想搵一個關心自己多啲,想人錫我,咁佢當時畀到呢個感覺我,將我擺喺第一位,而唔係想要物質,所以覺得想嫁畀佢。」

當然要建立一段婚姻,並不是一件容易的事,曾經有一段時間,他們的關係很差,子博說:「有一段時間關係好差,一開口就嗌交,乜嘢事都可以鬧!」Shirley續說:「喺2012年,我爸爸媽媽喺兩個月內先後過咗身,嗰陣我哋一齊住,以前好依賴佢哋,所以對我嚟講打擊好大,我要學重新做人老婆同媽咪,逼自己去成長,之後大家互相扶持,感情好咗。」

言談間他們亦分享了夫妻之道,Shirley說:「唔好嗌咁多交,有時喺對方身上睇到啲唔好嘅嘢,換轉係以前我會出聲,但係而家唔會講,可能講咗佢都未必鍾意,不如等啲細路去講,用佢哋把口咪好啲。自從有咗呢個病,有時候會諗多咗,可能因為容貌外形變咗,覺得自己好核突,又冇頭髮,去唔番以前,自信心真係好低,又擔心老公會嫌棄,女人始終會諗好多嘢。有陣我會同個囡講,阿囡真係好勁,佢會幫我𥄫住佢,仲會報串畀我聽!」子博還說:「我有一個幾好方法,就係一嗌交拎舊相出嚟睇,諗番最初心,嗰陣為乜結婚,大家嘅關係係點,你就會覺得嗌交啲嘢好細微。」

他更有感而發地說:「你問我結婚咁多年嘅難忘事,一定係2019年。啲人話人生有起有落,但係我覺得根本都冇起過,低處未算低,當然喺一個好差嘅環境,可以睇到一啲好好嘅嘢,可能會睇到雨後彩虹,因為有好多人幫我哋。我成日覺得有好多嘢都會過去,唔開心嘅嘢,差嘅嘢,甚至連病菌都會過去,只不過要喺呢段時間要點樣調節自己心態,唔好畀呢啲嘢影響心情,我咪同阿囝喺屋企成日做小丑引媽咪笑,我幫老婆約麻雀腳,等佢分吓心,又會帶大家出去睇戲同去旅行,所以2019真係好深刻嘅一年。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner