【狗仔出更】渣哥茶記門外有垃圾車車斗 蚊滋周圍飛惹衞生問題

更新時間 (HKT): 2020.02.14 19:48

譚小環老公蔡強榮(渣哥)最近逆市擴充飲食王國,於九龍灣常悅道一棟活化工廈地舖開設「大渣哥茶記」,受惠黃色經濟圈,生意不絕,食客經常要排長龍,不過,茶記開張不足半個月,渣哥今日竟與人起爭執!

事緣由大鴻輝興業有限公司持有的九龍灣其士工程中心,最近改裝成銀座式商廈,大堂及樓上單位仍有裝修工程未完工,但地舖已經出租予幾間不同食肆,其中一間是大渣哥,而今日有載住裝修廢料的垃圾車車斗停泊街上,令周圍都出現蚊滋飛來飛去,衞生環境極差。近日武漢肺炎疫情不斷擴散,渣哥尤其緊張食肆的衞生環境。《蘋果》在下午5時許到現場了解,見戴住口罩的渣哥頗為勞氣,與相鄰的烘焙店老闆一齊與工程公司負責人理論,現場所見車斗沒有用帳篷遮蓋,對正的烘焙店玻璃上清楚見到好多蚊滋飛來飛去,麵包店老闆愁爆說:「由於落雨積水,越來越多蚊滋飛入舖頭,我今朝掉咗百幾個麵包。」

當時工程公司負責人稱已跟食環署及渠務署聯絡,希望將問題解決,渣哥即說:「咁講啦,你租得地方畀人做食肆,都應該有企業責任,唔係收咗租,簽咗約拍吓籮柚。裝修一定有,我哋開張時未見有垃圾車車斗,情況好輕微(蚊滋)處理到,但今日放車斗喺度,咁多(蚊)咪反映囉,你同事話『係咁架喇!』你邊間建築公司,邊個敢用你哋呀?!」渣哥稱要懸紅30萬元叫人拖走,但最後工程公司疑見有傳媒在場,亦立即「做嘢」,叫工人用尼龍布蓋好垃圾車車斗,並好快安排拖車拖走。

事後渣哥餘怒未消說:「啲客好好,細細聲講話好多蚊滋。我同管業處投訴,竟然唔知邊個擺個垃圾車車斗喺度,查成個鐘先有人認頭。發展商大鴻輝點可以容許呢啲嘢,咁貴租你個舖,唔係包蚊滋呀?你送蚊早講吖嘛,有冇企業良心?放正隔離烘培店門口,人哋仲陰公,如果畀人放上網公審,點做生意呀?因為最近疫情嚴重,大家都特別緊張衞生。」

採訪、攝影:徐錦池

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner