【情人節送暖】76歲馮素波憐恤老友記 籌集1萬個口罩送公屋獨居長者

更新時間 (HKT): 2020.02.14 00:30

武漢肺炎擴散嚴峻,市民瘋搶口罩保命,低層和長者無力買天價口罩,境況堪憐!同是長者的76歲資深演員馮素波,雖然只是一名普通市民,但都希望盡棉力幫助獨居長者,故跟慈善團體合作,出錢出力籌集了1萬個口罩,今天情人節到公屋送給獨居長者,以解燃眉之急。

波姐接受《蘋果》電話訪問表示:「因為咁耐以嚟,我都好多謝各方面朋友對我嘅關心,幾次都係朋友打嚟問我夠唔夠口罩用,呢段日子,我都唔需要出去逼買貴爆嘅口罩,都係朋友對我嘅關懷。咁啱有個以前搵我拍微電影嘅監製,都問我需唔需要口罩,佢呢排同社區做嘢,話喺嗰度買啲畀我用。」

經了解之後,波姐希望盡己力幫助獨居長者,決定跟該機構合作籌集口罩,波姐與朋友夾錢認購了百多盒。「點解炒到咁貴畀貪心人賺錢,啲人發啲咁嘅財,如果我哋出啲力,自己有得用,人哋有得用,何樂而不為。只不過我冇能力做咁大,佢哋訂返嚟嘅口罩一批批,我話自己一班老友記,都好想為社區做啲嘢,私己錢亦唔係立亂揈,我都要對得住佢哋。而家我聯同朋友正式參與活動,我哋搵錢返嚟買呢批口罩,想對長者有啲表示,喺呢個咁嘅環境,點都好,有啲正面嘅消息畀人,唔使佢哋覺得咁慘!因為佢哋冇口罩,唔好講話落街,就算去覆診都需要口罩,令到我有感而發,自己能夠安坐家中,都有咁多朋友照顧,有人畀溫暖你,總好過冇人問。」

今天情人節,波姐會到公屋派口罩,「朋友都多謝我咁做,但冇人願意上樓送,個個都驚,我唔係唔驚,不過呢,得到呢幾位朋友支持,我一定要做到尾,希望各團體發起做,大家共渡時艱。」學佛的波姐更提出一種諗法:「因為我係學佛嘅人,有個諗法,一種死物,一種生物,非情同有情都需要愛,如果全世界都消滅佢,咁佢係咪反抗力好大呢?倒不如我多啲唸經畀佢哋,希望可以同人類平衡,唔好侵蝕我哋。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner