【撇仔女過情人節】林子博結婚17年與患癌妻甘苦與共:而家關係似拍拖

更新時間 (HKT): 2020.02.14 06:00

「其實呢,我發覺每一年嘅情人節,都好似一家人一齊過,今年終於可以撇甩佢哋,我哋兩個人可以唱吓歌,開開心心咁。今年係好特別嘅一年,舊年發生咗好多嘢,我想今年嘅情人節有啲特別,我哋賣甩咗啲小朋友,喺度過吓二人世界。我冇嘢送畀你,今年送首歌畀你聽!」聽到老公林子博的說話,在旁的Shirley一度眼泛淚光,輕輕地說了一句:「Thank You!」子博則用手輕輕掃一掃太太的背脊,場面既溫馨又感人!

前大台娛樂新聞主播林子博同太太Shirley結婚17年,婚後先後誕下女兒詠渝和兒子卓楠,一家四口本來過着幸福的家庭生活,誰不知Shirley去年4月被確診患上極罕見癌症「平滑肌肉瘤(腹腔)」,發現時癌細胞更已擴散到肝、胰、肺及淋巴,病情已進入第四期,只能接受化療。福無從至禍不單行,正當一家人齊心對抗癌魔之際,同年10月林子博又接獲無綫不續約的通知,連家中唯一經濟支柱也倒下來。

事隔2個月,終於傳來好消息,子博在社交平台留言:「2019冬至,化療終於做完。呢半年即使喺旁邊睇住都覺得唔容易老婆你真係好叻女!從今開始,我哋要好好細味感受每一日嘅來臨。從每一口空氣、每一件美食、每一個快樂嘅笑容,及與家人相處嘅每一秒!」林子博日前與太太Shirley接受《蘋果》訪問,談到今年的情人節,他說:「其實一直以嚟,我哋嘅情人節都好似家庭聚會,不嬲都同小朋友一齊過,佢哋都係我哋嘅情人,而且我哋對節日嘅觀念唔係好重,唔通一年只係得嗰日先慶祝咩,所以唔會覺得有乜嘢特別。不過可能經歷過一啲大事,你會覺得一家人可以喺埋一齊好足夠,已經係一份好好嘅禮物,唔一定要大魚大肉,或者要送乜嘢禮物。」

今年是子博與Shirley結婚17年,在這段婚姻關係上,兩人可謂嚐盡了人生的甜酸苦辣,Shirley說:「如果你問我,舊年嘅人生經歷係最難捱,肉體上做嗰啲療程都好辛苦,精神上亦都係,所以嗰陣成日話希望2019快啲過、快啲過,覺得過咗就好似過咗難關。」子博亦說:「差唔多係折磨咗一整年,但係諗番轉頭,我哋嘅夫妻感情係唔同咗,而家嘅關係好似拍拖,喺2019年成日拖住老婆隻手,以前真係會少啲,就算拍拖嗰陣我唔知係唔係宣示主權,話畀人知我係佢男朋友,但係而家一出街就會拖住佢隻手,覺得係有一份意義,好似有一個叫佢要跟住我嘅感覺。」

雖然Shirley目前的情況有所好轉,腫瘤亦縮細了少許,不過問到今年會否是重生? 她說:「未算係,因為我個病只係叫做有進展,但未算係康復,不過都畀咗自己一個信心,係有希望。」子博亦說:「始終我到而家都未搵到正職,只係freelance,係缺乏安全感,但係我有陣時都幾阿Q精神,而家個天唔畀正職我,係咪想唔畀我接觸啲病菌,再帶返屋企?有啲嘢好似係冇,但係喺冇嘅同時,個天可能有啲嘢係幫緊你,所以我而家唔會諗究竟係順境定逆境。況且事情已經發生咗,其實真係改變唔到啲乜嘢,既然改變唔到,無謂再去諗呀,你只可以改變自己嘅心情。」

Shirley亦說:「我係多得佢嘅正面,我自己係一個感情重嘅人,有陣時諗嘢比較悲觀,始終受嗰個係我自己,變咗都會擔心同恐懼,但係佢哋真係太正面,變咗令我可以唔諗,唔會勾起啲嘢,所以咪當冇事。始終我真係冇嘢可以做,根本睇唔到嚟緊嘅日子可以做到啲乜嘢,會唔會唔舒服?會唔會痛呀?真係好驚,有陣時個胃頂頂地,又會諗會唔會有事?但係當佢哋引開咗我,我咪唔會諗呢啲,加上好多人都話睇我個樣冇事喎,我咪記住啲好嘅嘢,個個都話點解你冇藥?因為你冇病囉!哈哈!」

至於將來,Shirley說:「自從上年有呢個病,改變咗我嘅諗法,有啲嘢我唔會諗得好長,淨係珍惜而家,太遠嘅嘢我都唔會諗。」子博亦說:「都啱嘅,做人諗咁遠,plan嘅未必係你預期嘅嘢,所以我唔係一個太有planning嘅人,開心過每一日就夠。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner