【武漢肺炎】森美父母被困鑽石郵輪 憂心:望港府盡快包機畀佢哋返嚟

更新時間 (HKT): 2020.02.15 17:30

【新增內容】

森美昨晚為無綫節目《全民開講齊抗疫》錄影,透露父母現正身處已有11名香港人確診武漢肺炎的「鑽石公主號郵輪」上,到目前仍需在橫濱港口隔離,令他非常擔心!

森美今日接受《蘋果》電話訪問,透露父母的房間沒有窗,過去幾日一直留在房間內,他形容似「困獸鬥」,他說:「佢哋現在喺船上等緊,船上三餐都OK,有廚房煮嘢畀佢哋食,有水同汽水,膳食方面係OK嘅。但有幾樣嘢較麻煩,因為唔可以出去,只能留喺房內,過去幾日只出過去一次,短短10幾分鐘上甲板後返嚟;加上間房冇露台冇窗,wifi又唔太暢順,成日喺船入面悶到好似坐監咁,我哋間中傳短訊傾偈。但有好有唔好啦,因為唔想佢哋接觸其他人,因為飛沫傳染嘅話仲麻煩,話晒喺船困獸鬥。」

森美父母已年過70歲,現時沒有任何病徵,他亦希望日本政府可以加快檢疫,令沒有事的乘客可以離開船,返香港隔離。他說:「佢哋有啲乘客想夾份,話叫香港政府出包機,又話請願,但噚晚林鄭話會做呢件事,所以最後佢哋冇做到。我都剛聯絡咗阿媽,佢話有啲朋友剛驗咗,未知幾時到佢哋,如果呈陰性可能讓佢哋喺其他地方隔離。希望香港政府早啲同日本交涉吓,船上面嘅檢疫方法好慢,希望可以周旋吓有冇方法快啲,畀佢哋盡快離開隻船。」

森美透露郵輪方面,今日派發每個房間一部手提電話,讓他們得到更多關於疫情資訊,但森美覺得作用不大,他解釋:「船上嘅人多數都係靠香港親友通知,因為佢哋都話,現在只能乾等。不過,阿媽剛留短訊,話現在可以隔日『放風』1小時。」森美透露父母今次出事,原本一直瞞着他,及後才由哥哥通知,問到是否很擔心?他說:「咁起碼佢哋冇病徵,仲有希望佢哋盡快離開,祈禱,惟有係咁。」昨日情人節,森美父母還收到一些驚喜,他帶笑說:「我父母話噚日有花同口罩等禮物送畀佢哋,我阿媽話郵輪,老竇話香港政府,唔知邊個,哈哈。」

記者再致電森美,問到美國已計劃派包機接走鑽石公主美國乘客,香港政府甚麼也沒做,未知他對港府處理方法有何睇法?森美回應:「叫佢盡快啦,應該都做緊㗎啦,我身邊都聽到好消息佢哋應該下個禮拜啦,其實下個禮拜19、20號到,佢哋隔離咗14日,喺間房裏邊,所以希望大府趕得切喺嗰段時間接佢哋返嚟。」可覺得政府反應太慢?森美說:「我覺得只要佢趕及佢哋14日完之前送到佢哋返嚟就OK,喺呢個之前,佢哋幫香港人同埋前線人員搵口罩同裝備用品先啦,喺呢個檢疫期間,我爸爸媽媽當然都驚啦,但都冇辦法,佢哋又唔落得船,根本都入唔到境,都過咗檢疫先入到境,所以14日完咗之後,喺嗰段時間能夠做得到,我都覺得可以接受嘅。」

《果GYM》隨身播  健身壹App過!

娛聞樂陪你走遍全球追星,即Like「娛果」FB 專頁!
BannerBanner