【講波佬哀歌 】疫情影響零收入 有線講波佬轉揸車送貨維持生計

更新時間 (HKT): 2020.04.03 19:36

武漢肺炎重創各行各業,全球體育項目亦受疫情影響全面叫停,包括東京奧運、溫布頓網球賽、NBA、歐聯、歐霸及歐洲和亞洲足球賽事。各大賽事叫停,香港一班「講波佬」亦慘變零收入,據悉香港現時有大約50、60位足球評述員,除NowTV支付月薪的10多名足球評述員有固定收入外,其他全都零收入,部份靠積蓄維持生計,部份要轉行揸車送貨甚至轉職到HKTV Mall做送貨員。

為有線、FOX等媒體擔任足球評述員的劉舜文,現時便要靠積蓄維持生計,他今日接受《蘋果》訪問時說:「我都係呢一刻停晒啲工作,惟有等賽事重開先,冇辦法。我係全職評述員,冇辦法,大家只能夠見步行步,我都預測唔到幾時重開,尤其是我主打歐洲足球,而家歐洲疫情差唔多全世界最嚴重,我諗同好多球員及足球工作者一樣,只好靜待疫情離去,而家呢一刻完全零收入之下,惟有慳啲使。」是否家中經濟支柱,又或者有供樓壓力?劉舜文說:「養家就一定要啦,但而家每日使費,每日用嘅錢,就盡量慳啲同盡量計得準確少少,貴啲嘅餐廳平時都好少去㗎啦,而家盡量留喺屋企,大部份時間都係用一啲低啲嘅budget去過活先啦。」

可考慮嘗試轉其他職業維持生計,如揸車?劉舜文說:「首先我冇車牌,識我嘅朋友、同事都知我平時都係一個比較節儉嘅人,但呢一刻轉乜嘢行業,真係比較難少少,我會選擇呢一刻用住積蓄捱一捱先,我估6月前啲波開唔番,希望半年內會開到,我希望咁樣捱到過去先,我可能有啲佛系,但都係冇辦法之中嘅辦法。你話要搵工,可以搵到啲乜嘢工?呢一刻可能好多行業,一個新入行嘅新人都唔係咁需要,本身個行業都有一班人待緊業。」

同樣為有線講波的足球評述員劉建基,今日回應《蘋果》時坦言收入大受影響:「人哋手停口停,我哋就口停口停,冇偈呀,成個世界都因為呢樣嘢,尤其是運動項目方面影響最大,我本身除咗評述足球之外,譬如羽毛球、乒乓波嗰啲我都會,全部停晒,我哋根本冇嘢可以評述,而我哋本身做評述員,香港大部份都係做一個節目收一個節目錢,我哋冇底薪嘅,冇包騷,成個行頭都幾麻煩。當冇任何外國賽事可以畀我哋做評述,我哋就等於零收入㗎啦。有啲行家本身一邊講一邊教波,籃球又有,足球又有,而家學校啲班停晒,可能焗住揸Uber,做吓其他part time工作,但最慘係咁嘅市道,就算你想喺出面搵啲嘢做,冇!我有啲行家去到做啲酒店炒散,都冇得你做啦,因為成個疫情影響太大,如果你本身有啲家底嘅、積蓄厚都好啲,咁香港地唔少都係手停口停,又要交租又要供樓,係影響好大好大。」

現階段如何維持生計?劉建基說:「我有製作公司,有好多客本身傾好晒,都因為個疫情打退堂鼓,有啲外隊計劃嚟香港,一啲U隊,同香港足球圈有交流,我本身接咗幫佢哋做拍攝工作,嗰啲全面都停晒,因為市面冇event搞,我哋製作公司自然冇嘢拍,所以收入上係大減嘅。Cable有啲外判工作畀咗我做嘅,我自己個人嚟講叫做死唔晒,但我收入都係冇咗8成,其實真係用緊積蓄,冇辦法,全香港人都係共渡緊呢個艱難時期。」

劉建基表示現時有些評述員嘗試揸車搵食,也有人到HKTV Mall揸車送貨:「乜嘢都要做,因為我等唔到政府救濟,就算有,係咪去到你個行業都成問題,香港咁多行業需要救,零售、飲食、酒吧全部死晒,邊個去救呀?」會否希望政府也能出手相助?劉建基說:「啱啱噚日香港體育記者協會都打咗畀我,都問番我哋行內每月有邊啲人受到影響,個影響有幾深,我哋出糧百分比,如果我係全職評述員,係零嘅,據我所知全香港得番NowTV仲有某啲評述員係包騷嘅,嗰度啲人仲有糧出吓,但大部份都係冇糧出,嗰個影響性其實係百份百嘅。老實講,我哋行頭唔大,亦都比較偏,雖然大家可能喺電視聽到我哋評述,但全職其實唔係好多,我亦唔覺得政府會喺呢方面出手,實在各行各業咁多人需要幫,佢幾時會睇到我呢個行業呢!」

已退役的香港籃球運動員宗銘達,任職籃球教練及為有線等媒體擔任籃球賽事評述,由於NBA全面停賽,宗銘達零收入,惟有轉揸車送貨維生。宗銘達今日接受《蘋果》訪問時說:「因為停晒講波,包括埋教波乜都冇,基本上我哋已經冇任何嘅收入,呢段時間除咗用自己積蓄之外,就要諗辦法喺其他方面可以多番啲收入,我最主要唔係揸車,我主要係同學校傾,點樣可以網上授課(籃球),其實係好難教,要諗好多其他唔同教材擺落去,我哋平時教波係講技術性嘅嘢,而家網上授課,就圍繞戰術同球例。」

娛聞樂陪你走遍全球追星,即Like「娛果」FB 專頁!
BannerBanner