【兄弟情不變】鄧一君廿年後出山拍《尋秦記》電影版:古仔叫到梗係幫

更新時間 (HKT): 2020.04.04 11:26

童星出身的鄧一君,成名作是1993年的《記得…香蕉成熟時》,「香蕉仔」一名講足多年,之後他輾轉到電視台,造就契機讓他認識圈中好友古天樂。說起鄧一君的「一君士多」食店,不得不提去年古天樂信守承諾撐老友,百忙中親自到油麻地的食店幫襯兼留影,兩兄弟reunion勾起不少人回憶。

鄧一君說:「我同古仔係97年拍《美味天王》時識嘅,之後拍《烈火雄心》,仲有《尋秦記》,雖然自己冇做呢行,但呢廿幾年大家都keep住聯絡。間中WhatsApp問候一下。」眾所周知,古天樂現時身為演藝人協會會長,忙拍戲亦要處理堆積如山的業務,不過向來重情義的他,對識於微時的鄧一君份外上心。鄧一君說:「佢未嚟過呢間舖(尖沙嘴分店),不過有試過幾次佢喺附近拍戲,叫助手打電話嚟買外賣送過去拍戲現場,古仔助手話『老闆話要萬歲呀。』每次叫親外賣都係幾百份雞翼、魚蛋、燒賣同嘢飲拎過去。」

問到這位老友的為人,鄧一君不假思索地說:「樣樣都好!」答案太空泛,例子呢?他認真地說:「係人都知古仔仗義相助,鍾意幫人,佢做好多慈善嘢,不過好低調咁做。佢呢樣嘢都影響到好多身邊朋友,好似我咁,我以前唔係成日做慈善嘢,冇呢個習慣,自從見到佢成日做之後,都改變到我心態『咦!係喎,你又唔係搵唔到錢吖,又唔係話冇能力幫人呀,好似老闆(古仔)咁幫吓人都得㗎!』我覺得呢啲叫生命影響生命,你有能力幫得勁啲,我咪小有小幫囉,譬如今次疫情,我哋私底下都有送吓口罩、酒精,但係我哋唔會攞嚟做宣傳,亦唔會話你食滿幾錢,就送啲乜畀你。」

時日變遷,往往投契的人因各有各忙少見面,結果雙方漸行漸遠漸無聲。正因為這樣,古天樂和鄧一君,一個現時在演藝圈身份舉足輕重,一個早已脫下明星光環走進另一個世界,友情卻能維繫至今。去年古天樂在影視博覽記者會上,宣佈將以原班人馬拍電影版《尋秦記》,幾乎所有人到齊影大合照,但原來當日沒有出現的鄧一君,亦有份到大陸客串幾日戲。他說:「古仔叫我,我咪去囉,佢話『唔該我』,其實係我多謝佢至真,畀我可以過吓戲癮。不過冇拍戲咁多年,我以為會好快上手,點知一拍番原來真係會生疏會緊張,會覺得啲對白難記咗,真係有啲吃力。」

鄧一君透露雖然自己是客串身份,但有幾場主線戲都落在自己和古仔身上,又有一班資深演員在身旁,冇壓力就假。「有場戲有三哥苗僑偉、阿峯(林峯)、張繼聰、郭羡妮,仲有智叔(廖啟智),企晒喺隔籬睇住我同古仔做對手戲,大佬我冇做咁耐,壓力梗係大,不過我都算warm up得快,拍咗半個鐘至一個鐘之後,以前細個感覺返咗嚟,最緊要個人放鬆啲就得。」曾經講過對幕前冇留戀的鄧一君,問到古仔再找他拍戲會否應承時,他爽快地說:「古仔開到聲實幫,冇所謂。」

娛聞樂陪你走遍全球追星,即Like「娛果」FB 專頁!
BannerBanner