【擔心踩界】寶珮如轟政府政策不明確 唔敢設美甲師上門服務

更新時間 (HKT): 2020.04.08 14:53

本月1日有美容院出現首宗武漢肺炎確診個案,政府今日才宣佈美容院和按摩院在後日起關閉至本月23日。藝人寶珮如去年底和友人在尖沙嘴合資開設美甲店,還有鄧洢玲(阿旦)亦在銅鑼灣開設按摩店,二人今日接受傳媒訪問時,寶珮如慨嘆生意難做,更指有客人要求她增設店中美甲師上門服務,但見政府政策不太明確,擔心會踩界。阿旦則求政府能果斷決策。

寶珮如受訪說:「所有美容院由周五開始要關閉14天,美甲店都唔例外,而家唔係我一間店,全香港美容業食肆都要經歷呢個艱難,呢個疫情未係穩定,我哋要注意同防備,都好驚吓,我哋之前生意都有影響,少咗人去扮靚,我哋公司做足準備,店內同店外都有日日清潔消毒,等客人嚟都安心,而家無奈要關閉都要聽話,我哋齊齊加油努力,面對疫症,相信明天會更好。」

她直言疫境下生意難做,所以會申請政府給中小企發放的抗疫基金:「我哋都會去申請,政府咁做好過唔做。我哋呢啲做小生意,一間舖要燈油火蠟同人工,仲有租金,停一日係冇收入,而家仲話停14日,仲有之前疫症都咁耐,成幾個月,我哋生意額一路跌,呢幾個月每月都蝕幾萬,有基金幫補有好過冇,睇話夠唔夠就每人意願,佢有做總好過冇做。希望疫症快過去,大家都正常返工作,群體生活,大家健康最重要,有健康先做到嘢。」

此外,阿旦則說:「我唔介意因應疫情措施去休業,但係之前已經有經驗亦有相當時間,應該係宣佈延期嘅同時可以講埋政府會點樣補貼幫店主,咁先可穩定人心。」

阿旦也會密切留意申請抗疫基金補貼損失,但未得到政府幫忙,她會先諗計自救:「大家都勸喻我搵業主商量,但係老實講呢個措施係政府推出,個社會責任唔應該由業主或公司僱主去負責晒。而家已經唔會講番轉頭最初封關嘅問題,淨係希望展望將來,希望將來政府喺決策時候可以更加果斷,好似補貼同資助各行各業等措施,希望快啲聽到有好消息!」

全民自救 抗疫資訊盡在《蘋果》

娛聞樂陪你走遍全球追星,即Like「娛果」FB 專頁!
BannerBanner