› 選擇地區
三藩市
紐約
洛杉磯
其他美國地區
香港 台灣 北美
 
2002年02月02日

馮仁昭四圍超:張信哲陪大馬靚女唱遊

張信哲日前帶馬來西亞朋友去「糖朝」食飯。

張信哲將會喺今個月九號(下周六)喺紅館開個人演唱會,最近佢喺台灣都有為個唱綵排,不過前幾日佢忙裏偷閒嚟咗香港。

沿途密斟
日前張信哲喺香港嘅時候,約咗一班朋友去尖沙嘴「糖朝」食飯同埋唱卡拉OK,而佢同其中一位女性朋友特別投契,佢哋食完飯,就徒步行去堪富利士道嘅一間卡拉OK,沿途二人密密斟,後來重一齊去唱K㖭。
問張信哲嗰位朋友係咪佢女朋友?佢話:「唔係,你哋唔好誤會,佢係我馬來西亞嘅朋友,佢咁啱嚟香港玩,所以先一齊去玩,佢遲啲重會睇我個演唱會㖭。」

施念慈順得哥情失嫂意
近日有報道話施念慈結婚嗰日,因為冇安排記者採訪而搞寸個派對,事實上雖然施念慈唔係事事安排周到,但佢當日仍然對記者嘅提問有問有答,又安排時間畀記者影佢切蛋糕。到擺酒時,佢重請咗一班相熟嘅記者去飲。馮仁昭覺得結婚係佢私人事,主人家又冇發採訪通告,所以有啲人又未免太小器啦!

霆鋒緊張女友王菲
查小欣噚日喺佢主持嘅商台節目《茶煲裏的查篤撑》度,講番日前佢同謝霆鋒一齊出席化妝品宣傳活動時,佢問霆鋒有乜方法去除黑眼圈?霆鋒話將隻銀戒指放入熟雞蛋度,然後用嚟碌眼袋。當時嗰個宣傳活動嘅主持梁芷珊聽完就話:「用銀戒指碌冇問題,霆鋒大把啦!」點知喺隔籬嘅霆鋒即刻話:「我得一隻咋!」霆鋒所指嘅嗰一隻戒指就係佢同王菲都有嘅情侶戒指,證明霆鋒都好緊張阿菲。

張學潤為關淑怡伸冤
張學潤噚日去中環接受新城財經台訪問,對於好友關淑怡被恒生銀行追五萬八千蚊卡數,佢就幫好友解釋話:「雖然我冇打電話畀佢,唔可以代佢講嘢,但係我識咗佢咁多年,淨係知佢份人大頭蝦,同埋佢嘅財政都由佢爹哋負責嘅。可能佢爹哋唔喺香港先至唔記得找卡數,以我所知,佢嘅經濟絕對冇問題。」

林保怡想過冰火新年
林保怡噚日去完新城電台接受訪問後,話自己近排都係忙緊作歌同出碟。問佢隻碟會幾時出街,佢話:「老闆黃栢高鍾意擇吉日先出碟,我自己都信㗎,好似搬屋、搬牀我都會咁做。」佢又話想過一個白色嘅新年,重要喺雪地上燒嘢食㖭,保怡份人真係幾多鬼主意。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載