› 選擇地區
三藩市
紐約
洛杉磯
其他美國地區
香港 台灣 北美
 
2002年03月03日

有衝動組家庭

古仔童年時經常跟父母、弟弟到京士柏公園遊玩。

家庭篇
古天樂(古仔)的父親兩度中風後,如今彷彿返老還童,有時古仔對父親的言行也覺得難以理解。但無論如何,古仔與父親的關係確實比前親密,近日他購入約值三千萬元的京士柏山豪宅,目的只是想一家人住得舒適。古仔還計劃拍竣手頭上的電影《乾柴烈火》後,舉家出埠旅行尋開心。

一切父母行先
古:𠵱家爸爸嘅情況好好,雖然佢病咗之後,屋企多咗個細路仔咁,佢有時會落街同啲唔識嘅人傾足成個鐘,係難以理解㗎,但我想佢開心,有乜事都係父母行先。𠵱家成個屋企由我負責,以前爸爸對我嘅言行舉止都會擔心,𠵱家佢會掛住同隻狗旅行多啲。
我阿媽就辛苦啲,但呢幾年佢開心咗,阿媽成日想個仔出人頭地,佢算如願以償啦,所以佢都冇乜嘢,佢份人有少少『大鄉里』,但幾鍾意旅行,遲啲我都計劃同佢哋一齊去吓旅行。

珍惜家人共敍
記:係咪覺得人大咗,家庭觀念重咗好多?
古:係嘅,細個係貪玩啲,我覺得應該留喺屋企多啲,但唔好用孝順去形容一件應該要做嘅事,呢樣嘢唔值得褒獎。我覺得要珍惜一家人喺埋一齊嘅日子,所以我冇搬過出去住,就算將來結婚,我都會同屋企人一齊住。
記:想唔想結婚?
古:新年嗰時我見到啲親戚帶住細路仔嚟拜年,好開心,我都好有衝動置番頭家,但細心諗又幾沮喪,自己做緊呢行,有細路仔會責任好大,對我嚟講都係幾遙遠事。

相關新聞:我EQ唔係好高

為搬屋忙不停
記:𠵱家買咗新屋,係咪有好多嘢要煩?
古:搬屋係有好多嘢要搞,連啲閉路電視點擺,買熨斗都要自己嚟,我阿媽又唔鍾意請菲傭,好彩𠵱家終於搵到個鐘點媽姐幫吓手。

後記:
古仔曾先後擁有八部車,當中包括法拉利和波子,問到古仔每年換一車的原因,他說:「車一落地就蝕錢,唔換車蝕得重緊要,所以喺唔蝕錢嘅情況下,咪換車囉。」
首次踩爬山單車的古仔,既親自試嵌單車,又在沙路上試踩,經過個多小時的「訓練」,古仔一臉疲累地說:「踩單車係幾好嘅運動,但真係幾扯氣㗎。」
撰文:朱芷瑩、陳月媚
攝影:黃文成、林德雄
協力:羅慧敏
單車提供:旺角單車專業公司

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載