› 選擇地區
三藩市
紐約
洛杉磯
其他美國地區
香港 台灣 北美
 
2002年03月08日

馮仁昭四圍超
梁詠琪:有人離間我同安仔

梁詠琪表示自己同安仔向來好老友,從未有要求換男主角。

台廣播劇《愛在紅的天空下》俾寰宇電影公司睇中,買咗版權開拍電影,男女主角分別係梁詠琪(GiGi)同許志安。但今期《壹週刊》報道,話GiGi嫌棄許志安拍咗好多爛片,冇票房保證,所以要求電影公司換男主角,電影公司唔接受佢嘅要求,最後GiGi被out出局。

拍攝撞期
GiGi睇完報道之後好唔開心,佢話呢啲根本唔係事實,佢同安仔係好朋友,所以演唱會都有搵安仔做嘉賓,佢覺得有人想離間佢同安仔嘅感情,同時又擔心安仔會誤會。GiGi話自己唔接《愛》片,係同佢之前接咗馬楚成嘅新戲,同埋《絕世好B》撞咗期。
其實馮仁昭知道《愛》片搵GiGi拍嘅時候,冇劇本,又唔知邊個係導演,只係猛咁叫佢畀期,咁就真係有啲問題。GiGi近來拍嘅電影口碑同票房都唔錯,人紅有是非呢樣嘢都好難避免,GiGi惟有睇開啲咯!

BoBo遭男歌迷癡纏
陳文媛(BoBo)噚日下晝出發去溫哥華,為無綫一個慈善騷演出。現場大約有過五十名歌迷送機,不過其中一個男歌迷嘅表現就過分熱情。
嗰個男歌迷走埋去要求同BoBo合照,佢重好自然咁搭住BoBo個膊頭。BoBo見到勢色唔對,於是影完相就一個轉身避開咗,但係個男歌迷過咗一陣又走咗去同在場嘅Twins影相。

曾志偉子跑馬地拍拖
曾志偉個仔曾國祥,前晚喺跑馬地同女友手拖手好開心,佢哋見到記者影相即刻好快咁彈開。問佢哋去邊,曾國祥話:「個女仔係我女朋友,我哋準備搵地方食飯,但係重未決定去邊。」問曾國祥女友嘅資料,佢話:「唔好問啦!」

容祖兒變身二十次
前排容祖兒(Joey)喺內地拍咗一輯便服廣告,佢會以二十個唔同嘅造型出現。便服商重搭咗個大型舞台,以配合Joey嘅勁歌熱舞,另外重會用一億嚟全國宣傳。由於Joey喺內地極受歡迎,有啲分銷商喺拍攝前五日專誠到廣州見Joey一面。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載