› 選擇地區
三藩市
紐約
洛杉磯
其他美國地區
香港 台灣 北美
 
2002年05月28日

身手不凡 倒豎葱濕濕碎
馮仁昭四圍超:張家輝識蜈蚣彈留番床戲

因住腦充血喎!

由張家輝、湯盈盈、張可頤、滕麗名同楊婉儀等主演嘅無綫重頭劇《十萬噸情緣》,噚日喺電視城完成廠景拍攝,隨即進行煞科拜神儀式,成班女演員都着上靚靚性感裝束現身,非常養眼。

打觔斗都得
喺噚日嘅試播片段中,見到張家輝經常施展絕技「倒豎葱」,後來佢應記者要求即場示範絕技,家輝講笑咁話:「呢啲好濕碎啫,我細細個時已經識,重有打觔斗同蜈蚣彈都識,但蜈蚣彈就要留番床上戲時先施展。」
另外,楊婉儀前日因為拍攝劇集《戇夫成龍》發生意外,鏡頭要佢向後跌落地,點知佢跌歪咗,率之整傷咗頸部,所以帶住頸箍。

華仔叫價高片商頭痛
最近有啲電影公司話,要搵有份量嘅男主角拍戲係一件難事,聽聞港片喺外地嘅版權收益愈嚟愈少,電影公司開戲製作成本就要控制得好好。唔怪之得坊間盛傳華仔叫價一千萬片酬,要先袋五百萬,其餘五百萬當係佢嘅投資,部戲版權又要有份,啲老闆覺得呢啲合作條件完全冇着數,所以同佢啲合作計劃好難傾得成。

楊紫瓊為覓男角頭痛
楊紫瓊拍完《天脈傳奇》後,又開始籌備新片《花木蘭》,佢好想斟周潤發做男主角,不過發哥啲期排到出年暑假,因為拍完吳宇森套戲後,出年三月又會再拍一部西片,最快要等到六月先有期,所以楊紫瓊都等唔切,要另覓人選,但要搵有國際知名度嘅男星演出就唔容易。

健仔內地飯碗危危乎
內地又有新政策箝制港台幕前幕後人員返內地搵食,以前內地電視台買港台劇集價錢都幾好,所以製作公司可以有較高條件,搵有實力嘅導演、紅星演出,但𠵱家內地電視台要聯手壓價,搞到唔少港台製作單位將啲拍劇計劃立刻叫停,成日返內地拍劇嘅張衞健肯定受影響。

無綫恃強勢播悶戲
無綫呢輪真係迫人轉台,兩個黃金時間都做內地劇集,播完《鐵齒銅牙紀曉嵐》後又推出《少年張三豐》同《少年包青天》,無綫有咁多存貨唔播,係要迫人睇內地劇,你估慣性收視大晒咩!好心亞視爭氣啲,趁𠵱家播套好嘢。好彩明珠台有新一輯《X檔案》同《仁心仁術》補數。

陳嘉上執導甄子丹新片
英皇下個月原本要開拍一部由梁詠琪同古仔演出嘅喜劇,但佢兩個都要為《絕世好B》趕戲,中國星又唔肯放人,結果佢兩個都接唔成呢部戲。不過英皇同甄子丹簽咗幾部片約,早前佢同英皇電影部阿頭陳嘉上同張承勷喺康城見面,初步傾好十一月會演出由陳嘉上執導嘅動作片。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載