› 選擇地區
三藩市
紐約
洛杉磯
其他美國地區
香港 台灣 北美
 
2002年08月17日

16歲保良局公子大讚後生又靚女
馮仁昭四圍超:Cookies鍾意BB女多啲

Cookies即場同BB玩,十足一班大細路。

女子組合Cookies同張燊悅等前晚以嘉賓身份,出席喺君悅酒店舉行嘅保良局慈善活動。Cookies九位成員前晚着番前幾日出席活動時嘅舊制服喺台上載歌載舞,佢哋唱咗兩首歌《心急人上》同《紅組加油》,不過舞步就唔係好合拍同埋有啲生疏。

爭取合照
表演之後,Cookies就爭住同保良局總理個BB女玩,大家玩到笑晒,不知幾投契,真係估唔到Cookies同BB女都啱傾。而今屆保良局主席李劉慧珠嘅十六歲囝囝李明昇,原來係Cookies嘅fans,重把握機會同偶像合照,佢大讚Cookies話:「我真係好鍾意Cookies,佢哋又後生又靚女。」
此外,之前有傳梁佩瑚同陳法蓉不和,梁佩瑚前晚再一次澄清話:「件新聞出咗街之後我哋有通過電話,大家都覺得得啖笑,我哋都係八九年同屆港姐,感情好好。」
採訪:林妙萍
攝影:仇志德

蔣怡占卜問愛犬健康
上一任「啤妹」蔣怡(Coco)噚日以嘉賓身份出席銅鑼灣「東角馬尺」開幕,佢玩勻成個商場之後,重即場玩塔羅牌,幫愛犬「忌廉」占卜問健康。
Coco噚日話佢隻愛犬腸胃有事,雖然已經帶咗「忌廉」睇醫生,但都重係好擔心,希望「忌廉」可以快啲好番。問Coco有冇試過玩塔羅牌問愛情,佢就話知自己拍拖拍成點,唔使求神問卜。

應采兒派對後忽然有伴
前晚一新表派對喺尖沙嘴舉行,連甚少去派對嘅應采兒都有出席,不過最特別嘅地方,係佢獨自到場,但玩到深夜離開時,同行多咗個男伴。當記者上前影相時,應采兒同個男伴好避忌咁即刻分開,重加快腳步離開,真係撲朔迷離。

向海嵐選港姐夠運
向海嵐噚日以慧妍雅集副會長身份,喺會展美食博覽會義賣月餅,重應善長要求簽名。對於之前曾志偉表示今屆港姐7佳麗余詩韻同佢樣貌相似,若佢今年參選,應該攞唔到獎,向海嵐話:「其實屆屆評判嘅準則都唔同,鍾意嘅類型亦都唔同,呢啲就係要睇個人運氣。」

劉愷威女友贈藥食到屙
劉愷威同老竇劉丹噚日一齊喺灣仔會展美食博覽會做宣傳,愷威大讚女友廖碧兒拍纖體廣告之後瘦咗又靚咗,重話女友拎咗啲減肥藥畀佢食,不過佢食完之後一日屙咗六次。愷威重話真係好羨慕女人拍纖體廣告,又可以瘦身又有錢賺,而佢就自薦拍剃毛廣告,皆因佢勝在多毛。

黃伊汶唔驚冇碟出
黃伊汶同周永恒被委任為「第三十五屆聯校科學展」大使,噚日佢兩個去咗科學館參觀。近日有傳新力唱片因王秀琳唱片銷量唔好,有意唔再幫佢出碟,而同王秀琳同期出道嘅黃伊汶就話唔擔心自己,因為其公司環球話佢新碟好賣過之前嗰隻,只要唱片銷量有進步,公司會重錫佢。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載