› 選擇地區
三藩市
紐約
洛杉磯
其他美國地區
香港 台灣 北美
 
2002年08月19日

Nelson出書爆湯寶如易領嘢
馮仁昭四圍超:關淑怡半夜急Call話撞鬼

Nelson力撐好友關淑怡冇撞邪。

張學潤(Nelson)最近投身作家行列,出書大講自己撞鬼經歷,重大爆圈中其他藝人遇過嘅鬼怪事。Nelson話同好友湯寶如出埠,最容易遇到鬼怪嘢,佢話:「唔知係咪同湯記一齊磁場特別犀利,成日都一齊見,好似我有次撞車,湯記好似有心靈感應咁,成晚喺床度輾轉反側,直至我四點幾打電話畀佢,佢先至話唔怪得梗係覺得有啲嘢。」

電視機作怪
Nelson喺新書度亦提及好友關淑怡(Shirley)一個搞笑撞鬼經歷,佢話:「舊年有一晚,Shirley半夜打電話畀我,話屋企有鬼叫我即刻去,我見咁夜就同佢講去都冇用啦,我又唔識捉鬼,點知佢又話要搵師傅,我惟有叫佢匿入房囉。到第二日朝早,佢打畀我話原來係電視機壞咗,所以見到有鬼影。」
對於關淑怡一直被傳撞邪,Nelson力撐好友話:「佢從來冇撞邪,我見鬼多過佢,至於佢一個人喺酒店飲咖啡,呢啲係佢嘅性格,佢鍾意自己一個人思考諗嘢,我有問過佢,佢話有時約朋友唔得閒咪自己一個囉。」
採訪:馮美茵

蕭亞軒坐吊車簽大名
蕭亞軒(Elva)今個月尾會喺香港舉行個人演唱會,不過因為新唱片推出嘅關係,Elva要台灣、香港兩邊走宣傳。
Elva噚日喺台灣西門町嘅廣場,搞咗個「親親Elva愛的『揭吻』日」,吸引到好多歌迷圍觀,佢重坐喺架吊車上面,為佢新唱片嘅大型海報簽名,認真大陣仗。

任港秀做得多收得少
任港秀啱啱喺海南島拍完電影《皇者爭霸》,喺片中佢做樊少皇嘅女友。任港秀話因為喺沙灘取景拍攝,所以曬到好黑重甩皮㖭,遲啲佢會同張栢芝細佬張豪龍拍一套電影。而近來任港秀都幾忙,因為好多內地美容院都搵佢剪綵,不過佢話雖然多咗嘢做,但唔覺搵多咗錢。

霆鋒學栢芝憑歌寄意
謝霆鋒將會暫時退出樂壇,休息一排再出擊。而日內霆鋒會全亞洲發行《無形的他—謝霆鋒全精選》,其中有四首新歌,《天使》一曲同張栢芝一樣憑歌寄意,歌詞「三千世界,早已化為微塵,早已冷卻」,而林夕填詞嘅歌《羅生門》,就話無論外間人點睇,都會唔理人。

郭羨妮無辜被雪藏
郭羨妮早排任港姐決賽表演嘉賓,唔小心走光,事後有人話呢件事引起無綫不滿,認為破壞形象,要抽起佢嚟緊嘅工作。噚日馮仁昭同郭羨妮保母Ronnie傾開呢單嘢,大家都覺得好好笑,事關件衫係無綫安排佢着,而且重係演出無綫節目,要怪都怪無綫啦。

陳見飛跳舞阿爸讚好
陳見飛噚日出席喺赤柱舉行嘅「有啲野show赤柱異演」,今次係佢首次上台表演,所以特別緊張。而噚日雖然掛起一號風球,但陳爸爸陳澤民(左)都有嚟捧場,不過因為怕畀個女太大壓力,所以陳爸爸等陳見飛跳完舞先去後台探佢,重大讚佢跳得好好。

F4新碟十月錄音
台灣人氣組合F4嘅唱片,原本計劃配合《流星花園2》推出,可惜四位成員各有各忙,錄音進度因而受阻。不過工作量最多嘅言承旭同啱啱推出個人唱片嘅吳建豪,都分別再度參與唱片工作。F4經理人江一朋話,言承旭大概喺十月就可以進行錄音。

繆非臨拍港版《色慾都市》
繆非臨前晚喺蘭桂坊出現,佢話嚟緊會拍美國大熱電視劇《色慾都市》嘅中文版,但佢未知自己會做乜嘢角色,淨係知舒淇都有份拍。問繆非臨會唔會因為同舒淇一齊演出而努力喼弗,唔畀對方比下去,繆非臨話向來都有喼弗,每日都會做一百下situp。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載