蘋果日報 | APPLE DAILY
› 選擇地區
三藩市
紐約
洛杉磯
其他美國地區
2002年08月22日

包300架巴士谷新碟
馮仁昭四圍超:英皇3T隨街都睇得到

鄭希怡嘅新碟將會喺下月推出。

英皇統稱3T嘅三位女新人蔣雅文(Mandy)、劉思惠(Maggie)及鄭希怡(Yumiko),將會喺下月中一齊出一隻EP唱片,英皇早前幫佢哋開盛大記者會,近日重斥資二百萬,買咗九巴車身廣告做宣傳。由下星期一開始,三百架巴士車身上都會有佢三個嘅靚樣同新碟預告,行勻港九新界,實行等歌迷行到邊都見到佢哋。

三倍宣傳費
呢個巴士宣傳廣告有三款,分別印咗Mandy、Maggie同Yumiko嘅新歌名稱,一人一百架咁多。佢哋公司咁落本谷宣傳,三個靚女日前異口同聲咁話:「好多謝公司咁睇得起我哋,呢個市道都肯畀咁多錢做宣傳,至於有冇壓力,少少啦,最緊要係盡力做好,唔好令公司失望。」
英皇MusicPlus高層甘菁菁噚日接受電話訪問,講起點解呢個市道都肯畀咁多錢谷新人,佢話:「英皇不嬲對新人都好落本,而佢三個係我哋好睇好嘅,佢哋唔係組合,所以宣傳費都要畀三倍㗎。」

蔡依林新歌變搞笑歌
蔡依林早前推出《假面公主之騎士精神》寫真集,銷量達五萬本,但口碑麻麻,而佢嘅緋聞男友周杰倫作畀佢嘅新歌《騎士精神》,口碑亦平平。有人話都係周杰倫唱番好聽啲,更有人將首歌改成《菜市場精神》、《少林足球》同埋《麥當勞薯條》等版本,蔡依林話唔介意喎。

黎明送錢畀女人使
喺新加坡宣傳新戲嘅黎明,罕有地接受訪問講婚姻睇法,原來黎明認為結婚冇保障,對女人嚟講,只係一張包住錢嘅紙,所以佢寧願送筆錢畀女人,唔使結婚喎,但佢又話如果遇到個令佢心甘情願奉獻一切嘅女人,佢都冇辦法喎。如果佢結婚,絕對唔會偷偷摸摸。

王晶讚MaggieQ勝安雅
王晶噚日下午去中環新城財經台,出席新節目《波馬縱橫》活動,佢亦會擔任該節目嘅主持。
王晶話前晚已經拍完安雅同MaggieQ主演嘅新片《NakedWeapon》,問佢安雅有冇因搖頭丸嘅事而影響演出?佢話:「安雅表現OK呀,佢問題唔大,我可以話係恰如其份,不過我會畀MaggieQ高分啲,因為佢打得好好。」

左慧琪揚威警界好興奮
有報道話今屆港姐亞軍左慧琪得到獎,因為佢爸爸係警司左禮宜,就連銅鑼灣警官俱樂部都貼咗左慧琪攞獎張相。噚日記者喺電視城見到左慧琪,話畀佢知呢件事,佢鬼死咁開心咁話:「係啊!好開心,好多uncle都當我係女咁,佢哋都有email畀我恭喜我得到亞軍。」

方子璇謝絕富豪照顧
方子璇同嘉禾經理人合約重有半年就約滿,𠵱家傾緊續約。方子璇話喺台灣嚟香港發展,所有使費都係公司畀,既然公司對自己咁好,如無意外都會續約,佢重話父母好擔心香港娛樂圈咁多是非,好似話富豪送樓送車畀女星咁,佢自問係辛苦命,將來重要嫁人,所以唔會接受俾富豪照顧。

袁彩雲做三秒邦女郎
袁彩雲噚日返電視城,為電視劇《衛斯理》試造型。原來今次佢係要扮演三十年代嘅邦女郎,佢話:「今次喺《衛斯理》入面,本來我係好斯文,但係有段劇情講麥包發夢,夢見我變成性感邦女郎,但係呢個造型只會喺套劇入面出現三秒。」

胡杏兒唔羨慕嘉碧儀
胡杏兒噚日接受新城電台訪問,對於今屆港姐嘉碧儀得到無綫嘅厚待,擔任《勁歌金曲》主持,作為前輩嘅杏兒就話:「可能公司想培育多啲新人,有多啲新鮮感。不過我又唔會羨慕嘅,呢啲係命運嘅安排,而且畀我做司儀都唔得,我好冇記性!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載