› 選擇地區
三藩市
紐約
洛杉磯
其他美國地區
香港 台灣 北美
 
2002年09月02日

馮仁昭四圍超:楊紫瓊HighHigh俾西人舔鼻

StarTV高層:唔小心抽水㖭!
楊紫瓊:哎吔!醜死怪!

楊紫瓊監製同主演嗰部《天脈傳奇》口碑雖然麻麻,但喺香港依然有成千萬票房收入,又難怪佢飲得杯落。前晚《天》片喺尖沙嘴香格里拉酒店舉行嘅慶功宴度,楊紫瓊好似新娘咁逐圍敬酒,大大話話飲咗成十支紅酒,重high到同個外國人玩「伸脷掂鼻」。

《天》片感覺好差
其實嗰個外國人係StarTV高層,佢同楊紫瓊飲到highhigh哋,話要示範用條脷掂自己個鼻,點知佢哋兩個人坐得太埋,個外國人一伸脷咪掂到楊紫瓊個鼻囉!楊紫瓊男友鍾再思見到呢個場面時唔知佢會點諗呢?
最近有人批評《天》片抄襲《臥虎藏龍》,而且故事老套,對於呢啲批評,楊紫瓊話完全冇打擊佢嘅信心:「拍戲最緊要熱誠,《臥》片係武俠片,《天》片係現代化中國片,兩者都唔同,我承認《天》片唔完美,應該話感覺好差,因為如果話完美嘅話,第時就唔會進步。」

四哥爆霆鋒帶女友旅行
噚日馬季開鑼,四哥(謝賢)隻馬「遊戲人生」都有出賽,但係就跑輸咗。對於拉姑喺雜誌訪問暗示霆鋒𠵱家有拍拖,四哥話:「梗係有啦,後生仔點可以唔拍拖!」四哥話霆鋒會喺禮拜四(五日)返港,之後可能會去外地旅行,佢話:「可能去有golf打嘅地方啦,或者帶幾個女朋友去㖭,話時話,我都要帶多幾個女朋友去。」再問佢霆鋒喺報紙寫嗰七封信,睇咗感唔感動?四哥就話:「感動,重喊咗幾場㖭呀。」

大美人幫老公栽小花
𠵱家已經嫁咗人上岸嘅大美人,外界望落佢好似好幸福,老公又有米,其實有苦自己知。雖然佢老公係有番咁上下身家,生活一定無憂,但係佢老公爛滾到飛起,最慘佢重要將出面嗰啲小花,安排住喺自己屋企附近,方便老公得閒去淋吓花,做老婆嘅,唔谷氣就假。

純情富豪拾草當寶
有個超級富豪都幾好笑,佢識咗個選美姐仔之後,重好似執到寶咁,但就俾上流社會啲人喺佢背後笑佢純情。因為識咗件草就當寶,而且呢位姐仔未俾超級富豪睇中之前,一路都係喺某酒店度搵食,後來有個老細介紹佢兩個認識,先至有得發展。不過超級富豪係有名望嘅家族,所以佢點玩都唔想同老婆搞離婚,所以姐仔一直入宮無望。

張耀榮兩太座送女出閣
演唱會之父張耀榮噚日嫁女,佢位千金張麗芳嫁畀鞋王亞太企業主席鄧劍群嘅二公子鄧偉業,噚日喺紅棉道註冊結婚,夜晚就喺灣仔會展擺酒,筵開百五席,花咗七位數字,全由男家支付。噚晚飲宴,賭王同四姨太梁安琪以及梅艷芳都有到。
不過噚日除咗一對佳人吸引人注意之外,最難得莫過於張耀榮同時帶兩位太座一齊出現,佢兩位太太一人一邊夾住張生咁企,而出閣女兒係二姨太所出。
當記者問到張生同二姨太會唔會唔捨得個女時,大太太望住二姨太話:「佢講國語㗎。」二姨太不甘示弱咁講:「我嚟咗香港九年喇,我識聽㗎,我又開心又唔捨得囉。」後來新娘被問到大媽都嚟係咪好開心,佢就話:「我哋一家好融洽㗎。」

吳建豪獅城Fans落本接機
台灣組合F4成員吳建豪嚟香港宣傳之後,再去廣州出席頒獎禮,而佢噚日就去咗新加坡出席當地嘅金曲獎頒獎禮,估唔到F4嘅魅力唔止中港台勁,連獅城歌迷都一樣受落。噚日吳建豪未出機場,已經有近四百歌迷塞滿機場,點知有五十個歌迷諗到個一定接觸到偶像嘅方法,就係花三百蚊坡幣(約港幣一千三百四十元)買張去大馬嘅機票,咁就可以入閘等吳建豪,結果佢哋得償所願,第一時間接到偶像,重送晒禮物影晒相,唔使喺出面同幾百人迫餐懵,不過如果吳建豪隔幾日就去新加坡一次,班歌迷咪買機票都買到破產?

祖兒人參贈籮記
容祖兒噚日去尖沙嘴接受《豁達Cafe》訪問,佢話睇到羅文嘅相覺得好心痛,佢話:「我之前探過籮記佢都冇咁瘦,不過佢個肚就細咗,呢一個係一個好迹象,我都買咗一支長白山人參畀佢進補。」容祖兒重話會去韓國拍廣告,佢會同另一個主角「爭仔」。而籮記嘅助手阿東噚日去咗跑馬地街市買餸,佢叫記者唔好影相,佢逗留大約十分鐘就離開。

男DJ自斷米路
男DJ早排俾唱片公司睇中,想搵佢出碟,但雙方得個講字,男DJ到𠵱家都係出唔成碟,其實原因係男DJ冇乜觀眾緣,把口又疏,所以唱片公司就拖住佢先。點知男DJ唔順氣,周圍同人講嗰間唱片公司嘅壞話,又猛踩嗰間公司嘅歌手,但結果咪又係傳番去唱片公司度,所以男DJ今次可以唔使等啦,因為人哋直情唔會再睬佢。

失婚女星陪客還債
馮仁昭早兩日撞到某個失婚女星拖住個男人,自從佢離咗婚之後,經濟狀況都唔係咁好景。個失婚女星同前夫早排欠一個老闆嘅錢,搞到失婚女星要跟埋佢搵食之餘,自己重要應酬內地客,其實呢個失婚女星演技唔錯,只可惜嫁錯郎先會行咗條不歸路,希望佢快啲還晒債,重過新生活。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載