蘋果日報 | APPLE DAILY
› 選擇地區
三藩市
紐約
洛杉磯
其他美國地區
2002年09月05日
馬上成為壹會員

女優着tubetop俯身搶晒鏡
馮仁昭四圍超:盧巧音--我唔會做啲咁嘢!

黃敏燁

盧巧音、女優黃敏燁、齊芷瑤、林嘉欣同江芷妮等,前晚去咗尖沙嘴海運戲院睇新片《好心相愛》首映。身為該片嘅男主角任賢齊有事缺席首映,剩番女主角盧巧音獨撐大局,點不知黃敏燁就着咗件紅色格仔tubetop同短裙仔,實行以性感招數搶鏡,演變成妹仔大過主人婆嘅局面。
黃敏燁一到場就去咗宣傳板前簽名,當時記者正同盧巧音做緊訪問,但黃敏燁嘅俯身動作,就立即成為記者鏡頭焦點。

簽黃柏高做經理人
現場有人同盧巧音講應該着性感啲嚟首映,只見盧巧音望一望黃敏燁,有啲不屑咁話:「我就唔會做啲咁嘅嘢。今晚(即前晚)我帶咗父母嚟睇戲。」
而林嘉欣最近就簽咗黃柏高做佢嘅經理人,佢話:「柏高去邊,我就跟住去邊。我已準備年底出唱片,𠵱家我跟陳潔靈同傅珮嘉媽咪學唱歌,我覺得廣東話咬字好困難。」齊芷瑤同江芷妮前晚亦不約而同以性感打扮到場,充滿青春氣息。

東東跑車行車證過期
陳曉東前日二十七歲生日,佢架黃色保時捷跑車嗰日停放喺沙田寓所樓下嘅停車場,只見貼喺車上嘅行車證於九月二日過期,問東東點解唔續牌?佢話:「呢排好忙,都好少揸,遲啲先啦。」
東東前晚八點幾同母親、經理人文雋同友人到中環小南國餐廳食飯,臨走嗰陣文雋同東東講:「等陣試吓啲招式先。」後來眾人去到東東有份投資嘅銅鑼灣大桶水足部按摩中心做腳底按摩。

東南亞富豪一拖十開派對
身邊有好多女性朋友嘅東南亞富豪,最近又喺當地佢屋企搞咗個狂歡派對,大大話話有成十位靚女出席,而且個富豪重預備咗好多藥物畀班靚女任食,食到個個鬼咁high。有人話個富豪咁大年紀其實已經有心冇力,但馮仁昭聽老友講,富豪嗰晚同一位未夠十八歲嘅靚女入房度春宵,成晚淨係聽到個靚女要生要死咁叫,問你服未。

好色阿哥連男人都啱
娛樂圈有位阿哥鍾意追女仔就係人都知,好多同佢合作過嘅都傳過緋聞,但原來娛樂圈阿哥唔單止好女色,連男人都啱,好多人聽到後都話覺得難以置信。佢最鍾意約埋成班「志同道合」嘅朋友,同成班男模上遊艇玩,真係諗起都覺得惡心。

呂良偉溫碧霞911冒險搭飛機
呂良偉同溫碧霞噚日晨早搭飛機起程去美國洛杉磯,參加國際兒童基金會慈善高爾夫球賽,問佢哋喺911一周年臨近嘅日子去美國,會唔會擔心?阿呂就話:「我自己唔擔心,我老婆都唔係個怕事嘅人,冇乜嘢要擔心。」
至於溫碧霞都話自己冇有怕,不過原定噚日出發,十一號回程嘅機票,就改咗十二號先至返,佢話:「生有時死有日,都唔擔心得咁多。」佢哋似乎都睇得好開,希望佢哋平平安安啦!

有錢新歌手享受全世界注目
新人歌手一出道就冇人睇好,佢靠銀彈攻勢成功出位,搞到街頭巷尾都有人識佢,不過大部份人都係取笑佢嘅外表同靠父蔭。其實新人歌手份人就冇乜點,重幾有禮貌,雖然佢明知街外人,甚至行內人都取笑緊佢,但佢就一啲都唔介意,皆因新人歌手自小就立心當明星,享受全世界注目嘅感覺,以前都經常參加佢老竇嘅天王老友嘅歌迷聚會,睇吓天王受萬千歌迷愛戴嘅情況。𠵱家唔理好醜,佢終於做到,都不知幾enjoy。

鄒靜上海搵到好老公
前女藝人、曾經同陳欣健傳過緋聞嘅鄒靜,上月九日低調喺香港註冊結婚,佢老公名叫Thomas,現年三十二歲,比伊人大兩歲。Thomas搞高科技事業,亦有投資製作同唱片公司。聽講佢哋去年喺上海相遇,交往咗一年就決定結婚。鄒靜日前同老公去咗台灣拍婚紗相,佢哋本來決定出年一月喺台灣補擺喜酒,但係因為老公好忙,所以計劃都會暫時擱置。以鄒靜喺娛樂圈嘅發展嚟睇,佢選擇搵張長期飯票,都未嘗唔係明智之舉。

趙學而話霆鋒唔算曳
拉姑日前大談兒子謝霆鋒幾個女友,霆鋒第一任女友趙學而,就絕對唔介意拉姑舊事重提,佢噚日喺電視城話:「我當日就係咁好彩,聽到個電台節目,拉姑嗰日主要唔係講我,我只係帶過。霆鋒唔係外間啲人諗得咁曳,佢都有佢優點,我唔會話畀你哋知。」唉!霆鋒真係幾生修到,無論何時何地都係咁多女人維護,霆鋒你真係得!

黎明玩失樂園
黎明同趙薇喺導演陳可辛嘅撮合下,將會喺新片《甜美生活》中合作演對手戲,呢套戲會由陳可辛監製,林愛華執導,黎明同趙薇喺戲中大搞婚外情,講述兩個已婚男女嘅愛情故事。黎明同陳可辛先後喺電影《三更》同《甜蜜蜜》兩部戲都合作愉快,所以陳可辛有新戲開都預好友黎明一份,其實黎明過往都同過唔少靚女,好似張曼玉、舒淇同原麗淇合作過,呢次夥拍趙薇,可以話帶畀觀眾另外一番新鮮感。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載