› 選擇地區
三藩市
紐約
洛杉磯
其他美國地區
香港 台灣 北美
 
2002年10月10日

黐脷筋𡃁妹仔人人愛
馮仁昭四圍超:阿Sa五萬片酬暴漲至80萬

李美鳳(左)、李美美(右)

英皇女子組合Twins嘅蔡卓妍(阿Sa),早前同鄭伊健合演電影《我老婆唔夠秤》,阿Sa喺戲中扮演一個講嘢黐脷筋,同埋行為好唔成熟嘅𡃁妹仔,充滿喜劇細胞。呢套戲上映至今,票房已突破五百萬,成績都算唔錯。
阿Sa近排當旺,而且片酬唔算貴,對票房靈藥楊千嬅好有威脅。𠵱家有寰宇電影、導演馬偉豪嘅天下電影公司、錢小蕙嘅公司同埋唔想肥水外流嘅英皇電影部,都爭住要同阿Sa簽幾套電影合約。

四間公司各簽一部
馮仁昭聽聞阿Sa嘅經理人霍紋希唔想大家因為咁而傷感情,公司就好平均咁同每間電影公司簽咗一部電影合約,以免順得哥情失嫂意。
馮仁昭重八到阿Sa因為《我》片大收,片酬重勁升,由五萬蚊跳升到八十萬,以現時四套電影合約喺手計,佢起碼有三百二十萬袋袋平安,荷包都咪話唔腫脹,睇嚟阿Sa嘅拍檔阿嬌(鍾欣桐)要急起直追喇!

李美鳳姊妹齊齊纖體兼𢱑銀
李美鳳自從成功喺瑪花纖體之後,到𠵱家都重保持住美好嘅身段,李美鳳更鼓勵胞妹李美美同佢一齊去纖體。所以美美大膽一試,終於成功纖體,重做埋瑪花嘅代言人,兩姊妹齊齊拍咗一輯平面廣告,實行有錢齊齊搵。

落難男歌手慘被壓價
落難男歌手早排經濟出現問題,雖然佢身邊嘅朋友都好幫佢,但都有啲人會乘機搵佢笨。好似佢早排拍電影,聽聞就俾人壓價,片酬只得兩萬蚊,同啲四、五線藝人差唔多。落難男歌手以前都叫做紅過吓,估唔到𠵱家竟然會如此下場。

蒙嘉慧濕身戲蝕底咗
蒙嘉慧噚日喺電視城拍攝新劇《衛斯理》,佢今個月底會去廣西同上海拍外景。佢話:「我試過拍濕身戲着白色衫打底,但好似冇打底咁,雖然冇出到街,都覺得蝕底咗!」

豆皮男歌手高調拍拖
豆皮男歌手同女DJ拍拖多年,到𠵱家都重拍緊拖。以前豆皮男歌手好介意人哋講佢嘅戀情,但𠵱家佢喺呢行都消失咁滯,做乜都唔怕俾人講啦,所以豆皮男歌手家陣都名正言順同女DJ一齊。佢哋𠵱家嘅拍拖勝地,就係位於小西灣某間酒樓,佢哋兩個周不時撐枱腳,高調公開戀情。

朱慧珊向何B獻吻
何守信(何B)、萬綺雯噚日出席亞視藝員生日會,身為何B拍擋嘅朱慧珊重話要吻賀佢。至於婚後嘅萬綺雯原來已經過咗生日,佢話正日就同老公一齊過咗個二人世界,問到佢老公送咗啲乜嘢畀佢,萬綺雯話:「呢啲梗係秘密啦,不過總之就係好嘢。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載