› 選擇地區
三藩市
紐約
洛杉磯
其他美國地區
香港 台灣 北美
 
2002年10月19日

F4下月廣州開騷
馮仁昭四圍超:Fans$2,400追星團好豪喎!

李克勤(左)、梁榮忠(右)

台灣人氣組合F4𠵱家除咗忙緊拍《流星花園Ⅱ》之外,重會喺下個月開巡迴演唱會,佢哋會喺下個月二十三號唱廣州站。

去埋慶功
康泰旅行社就把握機會賺錢,特登搞咗個兩日一夜團去廣州睇演唱會,個團重分咗五級,最貴嗰隻包前五行嘅貴賓飛,同F4住同一間五星級酒店,頭一百個報名,重可以參加演唱會慶功㖭!一個人要二千三百幾蚊,真係去台灣三日兩夜都唔使咁貴!
不過都有啲平啲嘅團,包三百蚊嘅演唱會飛同住其他酒店,就九百幾蚊。旅行社重特登安排今朝十點鐘開始,喺上環嘅門市接受報名,連旅行社都要出奇招,真係生意難做。
另外,之前印尼峇里島發生恐佈襲擊事件,不過F4無懼危險,喺下年一月照去印尼雅加達開兩場演唱會。有傳F4嘅巡迴演唱會,以印尼呢兩場嘅酬勞最高,一場有成一百萬美金(約七百八十萬港元)咁多,唔怪得佢四個唔怕死都要去啦!

陳慧琳叫人行開保靚樣
噚日機場星光熠熠,陳慧琳、黎明、林嘉欣、梁朝偉同古天樂分別出現離境大堂,離開香港。啱啱攞完傑青嘅陳慧琳,噚日精神好好,但係因為冇化妝,佢一見記者影相就雞咁腳走,重話:「遠啲影,遠啲影,我冇化妝呀。」唔好以為陳慧琳攞咗傑青就特別顧個樣,其實佢不嬲都好怕人影到佢憔悴嘅樣。不過佢都好友善咁叫你唔好影大頭,臨走時重同記者講拜拜。

克勤去美國「結婚」
李克勤(左)帶埋女友盧淑儀同梁榮忠去美國登台,問李克勤去邊,佢攬住梁榮忠話:「我哋去拉斯維加斯結婚呀。」點知盧淑儀正行緊嚟,李克勤見到好鬼尷尬。
另外,噚日有段新聞講九龍塘雲慈慧海功德會發生騙財騙色案,原來張學友係呢個會嘅主席,佢噚日出現機場要去武漢公幹,問學友知唔知呢單嘢,佢聽完就話:「唔清楚。」

貪心藝人鬧住攞贈品
有個都幾紅嘅中年男藝人,平日就風度翩翩,但係原來佢乜都貪得一餐。電視台嘅戶外活動,好多時都有啲禮物送畀觀眾,好似鉛筆、間尺咁,中年藝人乜都要,知佢喜好嘅公關通常都會留定啲贈品畀佢。不過,有一次個公關唔記得咗,俾個中年藝人鬧到狗血淋頭,馮仁昭都戥個公關慘!

陳豪戴神奇戒指
陳豪噚日帶埋大堆嘢去新城電台做訪問,其中包括手表、戒指同一架模型車,陳豪話:「主持叫我帶啲心愛嘅嘢嚟講吓,我呢隻戒指(紅圈示)係朋友送嘅,有神力㗎,我戴咗呢隻戒指之後,其他戒指都唔見晒。」
提到新劇《絕世好爸》收視唔錯,陳豪就話:「我怕觀眾睇完唔鍾意,點知反應咁好,我唔使再擔心啦!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載