蘋果日報 | APPLE DAILY
› 選擇地區
三藩市
紐約
洛杉磯
其他美國地區
2002年11月18日

亞視前港男改名選無綫主持
秦朗得獎成元君爆大鑊

成元君(右一)賽後在化妝間大數秦朗(左二)背信棄義。

兩位亞視前港男成元君與秦朗,刻意改名參加無綫《2002TVB8全能主持大賽》。秦朗得獎後,成元君大鬧秦朗,事前雙方約定在台上不會互數,但秦朗卻違背諾言。秦朗卻否認有協議一事,稱只是遵守大會規則。

無綫前晚在電視城錄影《2002TVB8全能主持大賽》,亞視前港男鄭維朗和成元鈞分別改名為秦朗及成元君參賽,結果秦朗與饒慧玲勝出,獲總值三十萬元獎品及無綫藝員合約。
比賽後,落敗的成元君在化妝間心生不忿,表示要爆大鑊。事緣比賽中有一個環節是兩名參賽者互爆對方缺點,成元君表示事前與秦朗約定,不要互數,反過來互讚對方。不過比賽時,秦朗大數成元君綵排遲到,成元君回應說:「大家喺台上唔應該互數,不如我哋互讚呀?」但秦朗仍繼續指成元君貪靚愛畫眉。

「佢講嘅冇樣真」
事後成元君氣憤地說:「佢講嘅嘢冇樣真,話我貪靚,你睇吓佢個化妝袋呀,佢又成日食口服液,又敷面膜。我喺台上又唔講得佢,因為佢啲嘢冇一樣可以出街,佢成日同啲女參賽者講色情笑話同性話題,又毛手毛腳,重話有藝人去馬拉叫雞,點出街呀?」
其後秦朗與成元君對質,秦朗說:「你有講唔好互數,但我冇sayyes,遊戲規則係咁。」成元君說:「總之我有講,重講咗五次。」秦朗見狀即說:「我尊重大會,個遊戲係咁玩,我攞獎好開心,唔想有爭拗,我走先。」

被無綫高層召見
此時成元君被無綫高層黃家亮召見,事後他說:「我要澄清件事唔關TVB事,佢哋好公平,呢啲係私人問題。」而有份得獎的饒慧玲被問到秦朗有否對女參賽者毛手毛腳,她說:「唔太清楚喎,我哋同秦朗都好friend,冇聽過。」
採訪:卓寶花 
攝影:陳偉權

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載