› 選擇地區
三藩市
紐約
洛杉磯
其他美國地區
香港 台灣 北美
 
2002年12月31日

董夫人梁司長捧場有飛屎
馮仁昭四圍超:杜麗莎開騷大女重搶鏡

杜麗莎嘅大女(左)着住低胸裝,好鬼惹火。

前晚杜麗莎喺尖沙嘴文化中心音樂廳舉行嘅《港樂.杜麗莎DIVA》音樂會,到場嘅嘉賓除咗有葉麗儀同老公之外,特首夫人董趙洪娉同埋律政司司長梁愛詩亦一齊去捧場,記者問董太係咪杜麗莎嘅fans,佢話:「我好鍾意佢,叫佢唔好返加拿大啦!」

全家總動員
問董太會唔會再睇多次?佢即時拍咗身邊嘅梁愛詩一下,重話:「你得唔得閒?」梁愛詩唔知係咪聽唔到,所以冇答,董太走嗰陣重同記者講:「HappyNewYear!」
杜麗莎前晚全家總動員,佢個大女TeresaVictoria同埋二女Alexias都上台伴舞,佢個大女着咗件綠色低胸裝,好鬼搶鏡,臨完場嗰陣,杜麗莎個外籍老公同埋個細女一齊上台獻花畀杜麗莎,杜麗莎好鬼感動,喺台度喊咗幾次。而喺演出完畢之後,重有百幾二百人攞住本場刊搵杜麗莎簽名,記者同杜麗莎講話董太嚟捧場,又話佢個大女好sexy,杜麗莎笑晒口話:「ThankYou!」

孫燕姿印度look拍MV
孫燕姿最新唱片《未完成……》將會喺日內推出,今次嘅專輯係孫燕姿早排去咗旅行半年時完成嘅,佢嘅第一首主打歌《神奇》重係佢喺倫敦欣賞舞台劇時有感而發嘅作品,首歌充滿濃濃嘅印度風情。孫燕姿為咗拍首歌嘅MV時能夠表達印度風味,除咗同MV男角以印度look示人外,重即興以手部動作表達歌曲旋律。

齊秦撞車左眼縫五針
齊秦大前日喺上海發生車禍,當日齊秦是到上海拍攝廣告,在往市區途中因為前面架私家車突然停車,令到齊秦要緊急煞掣,導致兩車相撞,齊秦嘅左眼即時遭殃,眼皮上方被損,齊秦即刻到上海浦東仁濟醫院縫五針後,大前晚。

任賢齊耳仔冇得醫
任賢齊因為聽覺受損影響工作,推咗幾部賀歲片約,小齊日前嚟香港出席前晚新城頒獎禮,佢話𠵱家要隨身攜帶耳塞,以防去到嘈吵嘅地方,令病情惡化,小齊話:「醫生話我個病唔會好,只可以食藥減輕病情,呢個病係後天造成,𠵱家去到好嘈嘅地方,耳仔都會好痛㗎。」

沈威大馬喊打記者
日前大馬有記者喺當地嘅茶原餐廳做有關飲食嘅訪問,點知撞到香港藝人沈威,沈威以為啲記者影佢,一路喊住要打人哋,搞到成間餐廳啲人都俾佢嚇親,但沈威又唔聽人哋嘅解釋,喺餐廳度鬧唔停,重不時企起身作狀要打人,後來佢喺朋友好言勸喻之下,先肯罷休。

《皆大歡喜》結局觀眾暴增105萬
上個禮拜聖誕節,無綫周一至周五嘅平均收視均下跌,《齊天大聖孫悟空》大結局篇平均收視只得三十點,約有一百九十七萬人收看,比起再上一周下跌一點,相反由薛家燕主演嘅《皆大歡喜》周六大結局,平均收視三十二點,約有二百一十一萬人收看,比起再上一周同時段多咗一百零五萬觀眾。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載