蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年01月19日
馬上成為壹會員

天后唔鍾意反成動力
千嬅七年努力 得咗!

千嬅在娛樂圈,仍保持當護士時那份謹慎及執着。

某年樂壇天后在奪獎後跟楊千嬅說:「以前我唔鍾意你,不過你係××人就加番你分,畀心機啦,出年輪到你攞!」聽完此番話的千嬅不但沒有不高興,反而感動起來,並成為奮鬥的動力,入行七年,她在今屆的四大音樂頒獎禮中,終於大放光芒。

相關新聞:鄭中基唔夾

今年二十九歲,加入娛樂圈七年的楊千嬅,今年終於奠定了其地位。
四大音樂頒獎典禮已曲終人散,千嬅囊括多個獎項,但對她來說,這不是終結,還有不少地方需要改善。千嬅說:「攞完獎嗰刻梗係開心,不過重有好多方面我做得唔夠好,好似我唱live俾人彈,知衰咪畀心機練好啲歌。演戲成日都係拍喜劇,今年我咪想試吓改變戲路。明知自己表達能力唔好,以後咪小心講嘢囉!」

圈中朋友唔多
問千嬅這幾年有何得着,她說:「屋企多咗好多雜誌,同埋我覺得𠵱家聽多咗歡呼聲同笑聲,呢啲係老闆Paco(黃柏高)加人工畀我嘅指標。」
千嬅續說:「不過,我覺得都算幸運,可以做到今日嘅成績,當然我要多謝身邊有咁多人幫我,雖然我喺呢個圈朋友唔多,但我唔覺得呢行係同行如敵國。記得上年喺一個頒獎禮度,有一個樂壇天后攞完獎之後走嚟笑住同我講:『以前我唔鍾意你,不過你係××人就加番你分,畀心機啦,出年輪到你攞!』當時我笑住咁答:『好!』然後個心係覺得好驚奇同開心,因為我諗唔到呢個圈重有人可以咁真同埋直,所以我到𠵱家重好欣賞佢,肯咁坦白同我講佢嘅感覺。

包死屍扮鎮定
「另外,我都好欣賞王菲,早排喺一個場合,我俾人灌到幾醉,佢竟然遞杯水畀我,然後佢同我講:『你飲水好啦!唔好再飲酒。』當時我真係好感動,冇諗過有前輩歌手咁關心自己。」
很多人都知道千嬅入行前曾當白衣天使,到現在她對實習時的片段仍歷歷在目。千嬅說:「記得做護士實習第一日,已經學包屍,第一次面對屍體,話唔驚就假,但我唔衰得,梗係扮鎮定啦!當時做護士要對住啲公公婆婆,同佢哋建立咗一段感情,然後親眼睇住佢哋過身,我會忍唔住喊,但當值嗰陣唔敢喊出嚟,所以我都係收工返到宿舍先敢喊。
「見得生同死太多,我對人生開始好灰,所以我先轉行,不過做護士嗰份執着同謹慎,我喺娛樂圈都一直保持住。」
撰文:陳月媚
攝影:林德雄
協力:羅慧敏

相關新聞:爸媽唔好惹

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載