› 選擇地區
三藩市
紐約
洛杉磯
其他美國地區
香港 台灣 北美
 
2003年01月19日

俾陳雅倫窒盟鼻菩薩好閒
馮仁昭四圍超:楊婉儀有未來奶奶呵番

楊婉儀(左):人哋唔抵得我哋咁恩愛喎!
王瑞勳(右) 資料圖片

舊年馮仁昭已經講過話楊婉儀(Winnie)喺今年四月,會同前練馬師王登平個仔王瑞勳結婚,雖然當事人連聲否認,但結果都俾傳媒踢爆佢哋喺婚姻註冊處排期註冊,真係想唔認都唔得喇!
噚日馮仁昭同王登平太太傾電話,講到佢就嚟娶新抱嘅時候,王太不知幾咁開心,猛讚佢個未來新抱:「Winnie好乖好斯文,又孝順老人家,總之仔大仔世界,個仔鍾意就得啦!」

「陳小姐好高貴」
不過,當講到陳雅倫話佢前度男友王瑞勳「冤豬頭都有盟鼻菩薩」時,王太聽咗之後就笑住咁話:「呢啲係佢個人見解,陳小姐都好奇怪,我都冇見過佢,佢都可以猛同人講,話未來奶奶唔鍾意佢,都唔明點解啲人學識咁高嘅!
「重有就係陳小姐好高貴㗎,有好多朋友同我講有關佢啲緋聞,但佢全部唔認,做人都係低調啲好!」
正所謂「薑愈老愈辣」,王太對陳雅倫呢招明讚暗踩,都認真高招,吓嘩!

憶蓮老公唔捧場重好
林憶蓮前晚喺台灣舉行音樂會,佢老公李宗盛因為要趕到美國工作,所以冇出現。憶蓮喺演唱會上唱咗老公為佢度身訂做嘅新歌《最好的事》,以呢首歌作為完結,憶蓮以國語話:「我並不覺得李宗盛不來會感到遺憾,如果他在的話,我反而覺得有壓力。」

古仔Sammi中環歎茶?
古天樂噚日約朋友喺中環飲下午茶,據知嗰時佢嘅緋聞女友鄭秀文都喺附近出現。古仔舊年同張栢芝合演嘅電影《我家有一隻河東獅》,近日就同鄭秀文合演新片《百年好合》,問佢同兩位靚女合作有乜嘢感受?古仔話:「都一樣好。」
另外,古仔日前去咗泰國曼谷出席「第五屆曼谷國際電影節」,古仔話好開心出席呢次活動,見到亞洲電影彼此之間都有交流,唔一定要去荷李活喎!

陳奕迅頒獎禮贏千二蚊
前晚陳奕迅(Eason)同劉德華齊齊攞「傳媒大獎」,當黃秋生宣布獎項得主時,佢話:「我爭邊個千二蚊,嗰個人就上嚟攞錢攞埋個獎啦。」
Eason先笑住上台,後來華仔話秋生同佢講,係秋生同Eason輸賭,港台叫得佢嚟頒獎,一定係頒畀華仔,唔會頒畀Eason,點知秋生輸咗。

狄龍悼念童月娟
港澳影劇總會前主席童月娟日前喺上海病逝,香港電影、文化同教育各界人士為悼念呢位電影界前輩,籌委會噚日喺太子道西明愛中心為童月娟舉行追思會,王天林、曾江同狄龍等都有到場,狄龍大讚童月娟生前係一位和藹可親嘅長輩,佢話:「雖然當年佢好出名,但冇架子,重好照顧我哋呢啲後輩。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載