蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年02月23日

歐倩怡:害我的人 謝謝!

九六年歐倩怡因參加《新秀歌唱大賽》而躋身娛圈,那年冠軍是何韻詩。 資料圖片

年前華星突然暫停出碟,旗下歌手如梁漢文、古天樂及何韻詩都走得快,跟華星的合約撇脫了斷,但剩下的Cindy與梁浩賢卻遲遲未能解約,令Cindy茫茫然不知所措,而當時在事業上還未起飛的阿旺,卻給女友送上心靈雞湯,一對小情人在患難中互相扶持,Cindy揚言如當日他們沒有共度難關,今天的情根也不會如此鞏固。
Cindy說:「華星事件令我心態上轉變好大,以前我樣樣嘢都係等公司安排,唔需要諗太多,但做落之後,我至發覺好多嘢得來不易,就連一個訪問,人哋都唔係奉旨搵你做,嗰時我唔識諗,事業上基礎打得唔穩,唱片公司突然有變動,我好無助,日日匿喺屋企喊。呢段日子維持咗成個月,啲朋友撩極我出街都唔去,我淨係不停亂諗,好悲觀。

「諗過去洗碗」
「我中五會考未放榜就參加《新秀歌唱大賽》,攞咗個『自我潛能表現獎』,簽埋華星,但公司突然變成咁,我有諗過不如做時裝店sales,但我連做sales都冇經驗,我有諗過去洗碗㗎,嗰時我至發覺自己以前太懶,直至男友同朋友用咗好多牙力勸我,叫我唔好再沉淪,我終於明白唔好再亂諗,因為愈諗愈驚。」
Cindy在鬱鬱不得志的日子中,她有家人、朋友及男友支持,令她捱過混沌歲月,她苦笑說:「嗰段時間有人落井下石,我試過遭人白眼,人哋講嘢句句有骨,但『多謝每個害過我嘅人』,呢句話已經成為我做人嘅座右銘,我會更加勤力。」

踏入羊年重旺
後來Cindy簽約新經理人公司,重返TVB,有份拍攝明晚播出的新劇《撲水寃家》,就連男友亦反彈成功,看來屬羊的Cindy並未受太歲爺影響,甫入羊年已經有個好開始。

後記
從前歐倩怡唱卡通片《櫻桃小丸子》主題曲而成名,許多小朋友還記得她那把「咇呢吧啦」的卡通聲。
其實郭晉安扮阿旺的聲調,跟Cindy平日說話頗相似,連Cindy也笑說要跟阿旺收版權。雖然「小丸子」時代已過去,但Cindy戀戀兒歌之心還在,她說:「有得唱唔知幾開心呀!點會怕定型?」採訪:朱芷瑩
攝影:陳慧安
場地提供:Izzue.com.cafe
服裝提供:
Sportmax、MaxMara、Kooka枰、iBlues

相關新聞:曾有第三者 想飛阿旺歐倩怡:佢係我終身對象

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載