› 選擇地區
三藩市
紐約
洛杉磯
其他美國地區
香港 台灣 北美
 
2003年03月08日

善長送鋼琴圓多年心願
馮仁昭四圍超:童星穎彤月賺數千脫苦海

林媽媽話穎彤咁生性,真係令佢覺得好欣慰。

在亞視劇集《萬家燈火》裏面飾演馮寶寶個女嘅十歲小演員林穎彤,身世原來好可憐,佢喺歲半大嗰陣因為俾爸爸拋棄,搞到佢媽咪要抱住佢喺天橋乞食。
雖然穎彤喺咁惡劣嘅環境下成長,但佢好生性好堅強,而呢件事曝光之後,引起唔少熱心市民關注,好似早幾日有位何小姐,知道穎彤最大心願係買部鋼琴,就諗住將自己部鋼琴送畀穎彤!

唔使再靠綜援
前日馮仁昭去穎彤屋企探訪時,佢話好多謝何小姐嘅幫忙,重話希望可以盡快摸吓部鋼琴喎。而穎彤媽咪就同馮仁昭講,話單新聞出咗嚟之後,有唔少人認得出穎彤係拍電視劇嗰個小演員。
穎彤𠵱家啱啱同亞視簽咗藝員合約,每個月有幾千蚊人工,加上穎彤家姐搵到嘢做,以後一家人唔使再靠綜援過活。馮仁昭問穎彤媽咪擔唔擔心個女做咗演員後會荒廢學業,佢話一啲都唔擔心,事關個女一向成績唔錯,每次佢一定做完功課後先至去拍戲,好鬼生性。

容祖兒病貓埋位即醒神
容祖兒(Joey)同郭晉安噚日喺奧海城為無綫新劇《美麗在望》拍外景,呢排忙緊拍劇同唱片宣傳嘅Joey噚日病咗,重因為頭暈所以唔接受訪問,不過佢一埋位就好鬼精神,認真敬業。而喺佢身旁嘅安仔就話:「我都知佢病咗,可能工作辛苦又唔慣拍劇,今次算係個大考驗,希望佢快啲無事啦!」

Boy'ZSteven一個月冇返學
男子組合Boy'Z噚日到電台接受訪問,喺節目入面佢哋分別同一位聽眾一組,結果Kenny答中九條勝出,帶挈聽眾攞到獎金二千蚊,但係Steven第一條就已經答錯,搞到好鬼尷尬㖭,佢話:「我𠵱家開始會日日睇報紙,連財經版都會睇埋。」就讀中四嘅Steven重好坦白咁話自己已經一個月冇返學,問佢驚唔驚追唔上時,老友鬼鬼嘅Kenny即時話:「我會幫佢補習㗎啦!」

志偉睇好秋生得獎
曾志偉同葉蘊儀噚日去咗馬來西亞,出席一個漁業展覽會,佢哋被委任做「海洋環保之星」,大會負責人跟曾志偉稔熟,並知道曾志偉係佛教徒,唔主張殺生,所以就最啱做「海洋環保之星」。對於嚟緊嘅金像獎頒獎禮,曾志偉憑電影《無間道》提名「最佳男配角」,而對手黃秋生就有三套戲得到提名,曾志偉話:「我預咗秋生會得獎。」

李克勤傳短訊𠱁GiGi
李克勤前幾日接受電台訪問,談到身邊一班好朋友,克勤話喺圈入面三個老友中只有梁詠琪(GiGi)係女仔,克勤話對GiGi同對其他男性朋友唔同,佢話:「男仔唔需要經常見面都可以維繫感情,但係對女仔就唔同,係要細心啲,我不時會傳一些手機短訊畀GiGi,問候一吓。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載