蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年03月30日

苦等三年 倒貼百萬 歌紅人唔紅
關心妍從「垃圾歌手」中走出來

關心妍由垃圾歌手變成今天的唱片銷量保證,足足等了三個年頭,確實辛酸自知。

關心妍近期分別與蕭正楠及唐文龍傳緋聞,但她強調與唐文龍只限兄妹情,雙方沒有發展機會,她更直指蕭正楠非她那杯茶。關心妍並揚言自己苦等三年、倒貼百萬才獲今日成績,她由當初的「垃圾」變為現時一人養起全間唱片公司,當中血淚可謂有苦自知。

奮鬥篇:你有心真係得咗
關心妍(Jade)簽約羅傑承開設的BMA唱片公司後,眼看公司先後力捧小雪和女子組合B2,等了三個年頭,其間沒有工作,沒有收入。幸好阿Jade出身自小康之家,從事美容生意的Jade媽一直支持女兒,過去三年,阿Jade的家人就倒貼了過百萬給她,要圓歌手夢,代價真的好大,也好貴。
回想等足三年的日子,阿Jade百般滋味在心頭,她說:「嗰時等咗咁耐,我都有諗過唔做,每年我都想放棄兩次,但最後我都冇,因為自己真係好鍾意音樂。嗰時唔開心,我會匿喺屋企攬住阿媽大喊一場,搞到阿媽都喊埋一份,發洩完第二日我又企番起身再等過。我真係好鍾意唱歌,就咁唔做我會好遺憾,所以我都堅持落去。」

養活整間公司
三年來,阿Jade不斷充實自己,她學色士風、學拉小提琴、學樂理,全部都自掏腰包,終於輪到她出碟了,但又要花上一大筆錢置裝,全賴Jade媽在經濟上作出支持。阿Jade說:「呢三年媽咪投資咗幾多錢喺我身上面,真係冇得計,六位數字就一定唔止,但我係一個對生活冇要求嘅人,所以除咗生活必需,平日我都唔敢問屋企人攞錢。𠵱家自己開始有錢賺,都有還錢畀媽咪,自己又儲啲。」
今時今日的阿Jade已不可同日而語,她早前推出的新碟,唱片銷量邁向白金數字,由於BMA旗下的B2及漢洋已暫停出碟,小雪的唱片銷量又未如理想,所以阿Jade的唱片要養活全公司十位職員。

保持靚聲襟撈
而一直以來,阿Jade都被指紅歌不紅人,她自知是一個靠賣聲的歌手,故她極有可能是繼容祖兒之後,另一位為聲線購保險的藝人。阿Jade說:「關心妍成功係因為得把聲,我最值錢、最寶貴嘅亦都係把聲,人哋買我張碟,主要係想聽歌,唔通想睇吓你影嗰幾張相有幾靚咩!上次我因為感冒,喺《勁歌》總選失聲,我打咗開聲針都唔得,真係好驚,如果把聲殘咗就冇得玩,所以我會好好保養自己把聲,我唔知原來把聲可以買保險,如果可以買嘅話,我都會考慮。」
阿Jade不會忘掉到各大唱片公司試音卻處處碰壁的經歷,但她會視之為一種考驗,她笑說:「全世界覺得我係垃圾都唔重要,我重可以等,到公司肯簽我返嚟,重畀好大自由度我去創作音樂,我覺得上天已經好眷顧我。」懂得珍惜和感恩,也許是阿Jade成功的原因。
撰文:朱芷瑩
攝影:林德雄
化妝:AnnieG.Chan
髮型:Tavin(HipHairCulture)
服裝:Morgan、Guess

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載